Banorët e Himarës protestuan sërish përpara bashkisë për të mbrojtur pronat e tyre, që janë planifikuar të prishen sipas planit të ri urbanistik, për t’i lënë vendin shëtitores që do të ndërtohet aty. Në mbështetje të tyre, këtë herë nga selia e PBDNJ-së në Tiranë, Vangjel Dule tha, se ka një kërkesë për kryeministrin Edi Rama. “PBDNJ shpreh solidaritetin e vet të plotë me kërkesat legjitime të banorëve dhe i drejtohet kryeministrit Edi Rama të nisë pa humbur kohë, personalisht dhe jo nëpërmjet marionetave të tij lokale, dialogun konstruktiv me komunitetin për t’u dhënë zgjidhje problemeve jetike, të dhënies së titujve të pronësisë pronarëve të ligjshëm dhe regjistrimit të pronës, ruajtjes së trashëgimisë kulturore dhe bukurisë natyrore, hartimit të një plani zhvillimi real të infrastrukturës së munguar të zonës dhe jo në shërbim të interesave ilegjitime, abuzuese dhe korruptive. Rama të braktisë, sa nuk është vonë, politikat selektive, klienteliste dhe paragjykuese ndaj Himarës dhe himarjotëve”, tha Dule.
