Prishje e marrëveshjes së 5 qershorit? Mustafaj: Nëse ndodh, opozitës i mbetet të nxjerrë njerëzit në rrugë

252
Sigal

Pyetjes nëse prishet marrëveshja e 5 qershorit nga Rama, çfarë duhet të bëjë opozita, ish-ministri Besnik Mustafaj u përgjigj: Nëse ndodh, opozitës i mbetet të nxjerrë njerëzit në rrugë

Ish-ministri i Jashtëm dhe ish-deputet i Partisë Demokratike, Besnik Mustafaj deklaron se kryeministri Edi Rama po tenton të prishë marrëveshjen e 5 qershorit, pasi në karrierën e tij nuk ka asnjë marrëveshje me kundërshtarët.

Në një intervistë Mustafaj thotë se Rama mund të ketë nënshkruar marrëveshje, por ai i shkel si atë të 17 majit të 2017. Për më tepër, ai thekson se nuk është momenti për Listat e Hapura pasi partitë e tjera nuk janë të përgatitura që të kandidojnë si të pavarura dhe shumë prej tyre do të shkriheshin.

Sipas Mustafajt, idealja do ishte që Listat e Hapura të bëheshin dy vite më parë që të kishte kohë edhe opinioni publik. Por nëse marrëveshja e 5 qershorit prishet, atëherë Mustafaj konsideron se opozita nuk ka tjetër rrugë veçse të nxjerrë njerëzit në rrugë.

“Për herë të parë në 7 vite të paktën, ndërkombëtarët janë shumë të qartë në mbështetje të një qëndrimi të opozitës. Që kërkon votimin e marrëveshjes së 5 qershorit. Pra u ra dakord për këtë në Këshillin Politik pa asnjë ndryshim. Ne nuk po zbulojmë si shqiptarë që Rama nuk është njeriu i marrëveshjeve. Rama ka shumë arritje dhe shumë dështime, por asnjë marrëveshje, asnjë. Kjo tregon që ai njeri nuk është i marrëveshjeve. Po fillon humbja e besimit mes palëve. Po fillon krizë e re në dëm të demokracisë elektorale.

Prishja e marrëveshjes si prishja e martesës. Pra trondit dy palët. Por normalisht më shumë tek ai që dëmtohet. Është shumë vonë për të ndërtuar sistemin e ri. Për të ndërtuar Listat e Hapura duheshin bërë para 2 vitesh, kur kishin mundësi partitë. Prishja e koalicioneve do e vendosë Bashën para partisë së tij, që nuk do pranojë që drejtuesit e partive të tjera të futen në listat e PD. Do shkrijë partitë e tjera, pasi nuk janë të përgatitura për të hyrë të pavarura. Pra Listat e Hapura do shkaktojnë tërmet. Rama do ta ngrejë pragun tani në 5%, dhe do ja bëjë një partie si PDIU që të mos futet në parlament.

Amerikanët nuk kanë folur ende. Është një thirrje nga Pompeo, por Kim ende s’ka folur. Duhet të flasë ajo, pasi kjo marrëveshje është në një masë produkt i saj”- tha Mustafaj

Çfarë bën opozita?

Opozita po përpiqet që të bëjë mospajtimin e saj me vendimet dhe përpjekjet e Ramës për prishjen e marrëveshjes. Opozita nuk ka rrugë tjetër veçse të nxjerrë njerëzit në rrugë nëse prishet kjo marrëveshje. Kriza do jetë e një cilësie të re negative.