PD: Afera e inceneratorëve dhe roli i qeveritarëve

666
Drejtuesi i Departamentit të Mjedisit në Partinë Demokratike, Jamarbër Malltezi, akuzoi qeverinë për çështjen e inceneratorëve. “Ministri i Mjedisit, Blendi Klosi, që harxhon më shumë kohë në kazino se në zyrë, doli në qytet për të mbrojtur inceneratorët, importin dhe djegien e plehrave. Për Partinë Demokratike është e papranueshme që shëndeti i banorëve të Tiranës të trajtohet nga Ministri i Mjedisit si hedhje zaresh në kazinotë e tij të preferuara. Afera 178 milionë euro-she e inceneratorëve është një nga aferat më korruptive të qeverisë Rama. Të tre djegësit e plehrave, në Elbasan, Fier dhe Tiranë janë nën administrimin e Klodian Zotos, sekserit të Arben Ahmetajt”, tha Malltezi. Sipas tij, PD ka siguruar dokumentacionin e plotë se Klodian Zoto është bërë administrator edhe i kompanisë së riciklimit të mbetjeve në Tiranë. “Kjo do të thotë se Edi Rama, duke përdorur kukullën e tij Veliaj, ka përqendruar në një dorë industrinë e ricikilmit të mbetjeve. Sipas kontratës, Bashkia e Tiranës, pra Erion Veliaj, është e detyruar ta furnizojë Klodian Zoton me 550 ton plehra në ditë dhe, nëse nuk e arrin këtë objektiv, do ta paguajë kompaninë me lekët e banorëve të Tiranës. Për pasurimin e vet nëpërmjet inceneratorëve, Edi Rama u ka hequr licencën 100 bizneseve të riciklimit dhe po lë pa punë mijëra familje. Tani është e qartë përse Edi Rama u bë flamurtar i importit të plehrave, duke mashtruar shqiptarët se ricikluesit do të falimentonin pa lëndë të parë importi”, u shpreh drejtuesi i Departamentit në PD.
Sigal