Pedagogu i gazetarisë dhe aktivist i shoqërisë civile, Ervin Goci publikon listën e monumenteve dhe trashëgimisë kulturore e listuar për t’u shkatërruar.
“Siç pata mundësi që të denoncoj mbrëmë te studio e Sonila Meços, lista e monumenteve, e trashëgimisë e listuar për t’u shkatërruar është shumë e gjatë. Përveç, Maternitetit dhe Mozaikut, ndërhyrje shkatërruese priten te Galeria e Arteve, tani po lexoj që është dhënë dhe Leja për “Shtesë”, pra për ta shkatërruar njëlloj si Maternitetin “Mbretëresha Geraldinë”.
Në listën e pritjes për t’i vënë kazmën, kemi Akademinë e Shkencave, Bibliotekën Kombëtare, Muzeun Kombëtar, Teatrin e Kukullave, Ministrinë e Kulturës, Akademinë e Arteve, dhe ish-godinën e Lidhjes së Shkrimtarëve, pra të gjitha janë listuar për të ndërhyrë përdhunshëm nën pretekstin e rindërtimit.
Kjo nuk zgjidhet me shfryrje në TV, por kërkon aksione dhe qëndrime politike të prera në mbrojtje të pasurive të përbashkëta, që nuk janë as të miat e as kurrkujt, por janë të të gjithëve.
Kam një thirrje për liderin e opozitës, Lulzim Basha, si kandidati për Kryeministër, i cili pretendon të marrë fatet e vendit në dorë, që të dalë me një qëndrim të prerë për ndalimin “TANI”, theksoj “TANI”, të çdo iniciative për shpërfytyrimin e trashëgimisë së përbashkët. Duhet me ditë e datë, që ditën e parë që do të hyjë në zyrë, do t’i stopojë, do t’i bllokojë të gjithë këto projekte dhe do të çojë në Prokurori të gjithë përgjegjësit.
Ky qëndrim i prerë duhet sot, se nesër është shumë vonë, jo si vjershë, por si zotim.
Nëse kjo nuk ndodh, unë si qytetar i angazhuar kam të gjithë të drejtën të konsideroj se opozita është farsë, nuk ka as vullnet e as fuqi për të çuar përpara vullnetin e qytetarëve, po do të kthehet në administruesin e katastrofës që po mbin kryeministri në fuqi, duke e legjitimuar.
Ne bashkë me aktivistë të tjerë po përgatisim një kallëzim të gjerë për të denoncuar skemën mafioze dhe kriminale që po zbatohet me ftohtësi mbi pasurinë tonë të përbashkët, Qytetin e Identitetin.
Ftoj dhe subjekte të tjera opozitare, kandidatë të pavarur që ta ngrenë zërin dhe të vënë theksin këtu, sepse këtu është emergjenca, tani.
Me poshtë gjeni apelin tim në studion e “Tempora”, keni listën e monumenteve që priten të shkatërrohen, dhe Lejen e Ndërtimit për të ndërhyrë përdhunshëm te Galeria e Arteve me shtesa e “rikonstruksione”.
Ditë të trazuara, po që duhet t’i kapërcejmë të bashkuar…
”, shprehet Ervin Goci përmes rrjeteve sociale.
