TIRANE – Është konstituuar gjatë kësaj të mërkure Komisioni për Dekriminalizimin dhe zbatimin e vendimeve të Gjykatës Kushtetuese. Qysh në nisje të seancës opozita i ka rikthyer edhe njëherë akuzat për kriminalizim të parlamentit, kjo ka sjellë reagimin e mazhorancës e cila kërkoi që konkluzionet të dalin në fund të komisionit. Për mazhorancën pika për zbatimin e vendimeve të Gjykatës Kushtetuese është pa sens, megjithatë ajo është e gatshme të punojë me opozitën për çka kërkohet.
Bylykbashi: Ndryshimet politike nxorën në pah rekorde kriminale. Besoj se ky komision do funksionojë me vullnet për t’i dhënë zgjidhje dekriminalizimit dhe zbatimit të vendimeve të gjykatave.
Balla: Prej ditës së parë qoftë PS qoftë LSI kanë shprehur dakordësi. Kolegët të bien dakord që t’i bëjmë në fund konkluzionet. Çështjet duhen adresuar. Edhe marrëveshja është bërë në këtë sallë të Komisionit të Integrimit siç po bëjmë dhe sot. Jo çdo gjë që thotë opozita është e drejtë. Të ngresh komision për zbatimin e vendimeve kushtetuese është njësoj si të thuash a do zbatojmë ligjin. Besoj e keni kuptuar 6 muaj jashtë kuvendit këtë gabim.
Ndërkaq Spartak Braho deputet i LSI-së i ka kërkuar shpjegime opozitës se çdo të thotë persona me rekorde kriminale, duke u shprehur më tej se opozita po bën demagogji.
Braho: Në rezolutë janë nominuar 3 çështje, dy prej të cilave kanë zgjidhje. Pika tre, çfarë do të thotë persona me rekorde kriminale? Këtu ka dhe demagogji. Te heqim këtë cilësorin “ky është kriminel” se ju e keni të zhvilluar këtë. Nëse se hiqni unë do them në çdo mbledhje që kryekriminel është Sali Berisha
Bylykbashi: Puna e komisionit do ta qartësojë çdo të thotë rekorde kriminale
Nga ana tjetër opozita përmes deputetit Eduard Halimi tha se duke qenë se jemi para zgjedhjeve vendore duhet bërë gati një paketë ligjesh që të pengohet kandidimi i personave me precedent kriminal.
Halimi: Nuk do bëjmë hetime të personave pasi nuk kemi kompetencë, por për të hartuar dispozita ligjore që ato fenomene të mos përsëriten. Nuk kemi ndonjë mundësi këtu t’i fusim këmbët në një këpucë mazhorancës. Kërkesat e opozitës për komisione hetimore janë refuzuar. Kryetarët e partive janë duke përzgjedhur kandidatët, paketë ligjesh që në zgjedhjet e ardhshme mos të kandidojnë persona me precedent kriminal.
Komisioni i posaçëm miratoi me konsensus deputetin Ulsi Manja si sekretar, ndersa Oerd Bylykbashi eshte kryetar i tij.
