Kryeministri Edi Rama ka pretenduar sot se falë qeverisjes së tij janë vënë nën ujë, 135 mijë ha tokë më shumë se gjatë qeverisjes së PD-së. Me shifra krahasimore, Rama tha në Fb se ato flasin sa 1000 fjalë për transformimin e bujqësisë, rritjen e prodhimit e të eksporteve në më shumë se dyfishin e tokës që punohet sot krahasuar me 7 vjet më parë.
Por, i menjëhershëm ka qënë reagimi i opozitës. Partia Demokratike nëpërmjet Dorjan Telitit, shefit të kabinetit, duke e goditur pikërisht në shifrat që kishte dhënë vetë: Teliti analizoi:
“Edi Rama në 7 vite u ka marrë fermerëve 100 milion euro vetëm nga rritja me 24 lekë të taksës së qarkullimit mbi naftën që përdorin në bujqësi. Defiçiti vjetor i shkëmbimeve bujqësore vetëm me BE-në është thelluar me 85 milion euro që kur ER erdhi në pushtet. Me statistika të rreme për sipërfaqen e tokës së ujitur, ER prapë nuk i mbulon dot premtimet e gënjeshtërta për fermerët shqiptarë.
Ujitja e 5 mijë ha tokë më shumë në vit është thjesht qesharake (210mijë ha kishin akses në ujë në 2013). Kurrë me qartë se gjatë kësaj pandemie u duk braktisja dhe nënçmimi i ER për fermerët.
48% e popullsisë së vendit jeton në zonat rurale, 20% e ekonomisë shqiptare vjen nga bujqësia, por Edi Rama dha vetëm 6 milion për fermerët. 15 herë më pak se Kosova (91 mil euro), 13 herë më pak se Maqedonia e Veriut (80 mil Euro), 10 herë më pak se Mali i Zi (61 mil euro).
Edi Rama ka vëmendje, para dhe interes vetëm për një sektor: ekonominë mafioze të PPP-ve të plehrave.
