Sali Berisha u ndal në Berat për foltoren e radhës me demokratët, ku nga salla një i pranishëm tha se Lulzim Basha nuk ka më mbështetës në bazë.
“Kam ardhur nga Divjaka për të firmosur formularin e mbledhjes së Kuvendit. Kam ardhur këtu për të thënë se Lulzim Bashës i ka ngelur vetëm kosherja, se bletët i kanë ikur”, tha ai.
Një tjetër i kërkoi Berishës që “t’ja falë jetën” Partisë Demokratike.
“Doktor, unë të uroj edhe 1 mijë vite, por edhe 24 orë jetë të kesh, atë falja Partisë Demokratike. Kjo foltore është një vaksinë e kolerës komuniste dhe një antibiotik në kohë pandemie dhe antibiotiku djeg nga pak. Më mirë të vejë djegia deri në fund dhe PD të dalë sa më e bukur”, tha ai.
“Lulzim Basha, haram e paç sakrificën time që u ftoha në çadër”, vijoi ai.
Berisha njoftoi nga Berati se i ka mbledhur prej kohësh mbi 50 për qind të firmave që nevojiten për mbledhjen e Kuvendit Kombëtar.
