Lëvizja Rinore për Integrim organizoi Konventën Kombëtare Zgjedhore në Shkodër. Në aktivitetin e zhvilluar në teatrin “Migjeni”, qindra të rinj, anëtarë dhe simpatizantë të LRI-së me mjaft entuziazëm, energji dhe besim shprehën mbështetjen e tyre për dy kandidatët që garojnë për kreun e LRI-së.
Të pranishëm në këtë aktivitet ishin Kryetari i LRI-së, z. Endrit Braimllari, deputetja e LSI-së, znj. Kejdi Mehmetaj, dhe deputeti i LSI-së së qarkut Shkodër, z. Agron Çela , si edhe përfaqësues të tjerë të LRI-së në këtë qark. Në fjalën e mbajtur gjatë konventës, deputetja Kejdi Mehmetaj deklaroi se LSI-ja ka ditur që në gjithë këto vite t’i kthejë shpresën të gjithë të rinjve shqiptarë për ta parë veten e tyre si pjesë të Shqipërisë, jo vetëm tani, por edhe në të ardhmen, duke i bërë ata që të jenë të përfaqësuar në Parlament dhe në këshillat bashkiake.
“Kemi arritur që të përcjellim vlerat më të mira të rinisë shqiptarë, me studentë të shkëlqyer, me studentë të talentuar, me të rinj që kanë ëndrra, shpresa vizione. Ndihem shumë e lumtur, që i shoh këto shpresa dhe ëndrra të mia në sytë e të gjithë të rinjve që tashmë do të punojnë për rininë. Me ju gjithmonë do të kemi mundësinë që të ndërtojmë një të ardhme të mirë për të rinjtë e vendit tonë. Por ama kemi shumë në dorë për të ndërtuar dhe për të formësuar të rinjtë të cilët do të dinë që t’ia dalin mbanë për të ardhmen dhe do të dinë të përballojnë çdo sfidë të së ardhmes”, – tha znj. Mehmetaj.
Deputeti i LSI-së, z. Agron Çela u shpreh i emocionuar për pjesëmarrjen e jashtëzakonshme, ndërsa kujtoi se vite më parë LSI-ja ishte e vogël, por sot ajo është shumë, shumë e madhe. Ai tha se çdo investim apo mbështetje për këta të rinj është e merituar, pasi janë shume aktivë dhe me punën e përkushtimin e tyre kërkojnë një Shqipëri ndryshe. “Jam krenar për rrugën që zgjodha, që të jem pjesë e politikës, njëkohësisht të jem pjesë e kësaj force politike e cila ka vizion, ka të ardhme, ka në pikat kryesore rininë. Gjatë këtyre tre viteve nuk ka munguar asnjëherë vëmendja ndaj jush. Bashkëpunimi i këtyre tre viteve tregohet edhe sot, dhe meritoni një vlerësim të jashtëzakonshëm”, – tha z. Çela.
Kryetari i LRI-së, Endrit Braimllari, u shpreh se Lëvizja Rinore për Integrim tashmë nuk është thjesht vetëm një ekip, por është një projekt afatgjatë i cili ka trashëguar breza. “Sot ne ndjehemi krenar, sepse të rinjtë dhe të rejat e Lëvizjes Rinore për Integrim jo vetëm këtu në Shkodër, por në të gjithë Shqipërinë na përfaqësojnë në mënyrë dinjitoze jo vetëm si të zgjedhur në Parlament, si Kejdi dhe Silva, por dhe si të zgjedhur vendor, që japin një kontribut të jashtëzakonshëm në hartimin dhe implementimin e politikave që janë në shërbim të Shqipërisë. Por thelbi dhe qëllimi ynë ka qenë përkrahja e çdo të riu anembanë vendit sepse ne jemi të bindur që Shqipëria ecën më shpejt dhe me më shumë energji nga të rinjtë, me më shumë pasion, me më shumë mirënjohje dhe dashuri”, – tha z. Braimllari.
Kandidatja për Kryetare të LRI-së, Floida Kërpaçi, tha se LRI ka vite që punon dhe nuk ka reshtur së punuari për kauzat e të rinjve dhe kjo falë mbështetjes së madhe që Ilir Meta dhe Lëvizja Socialiste për Integrim ka dhënë.“Sot ne kemi një forum të fortë dhe zëplotë. Një vend ku respektohesh dhe të jepen mundësi dhe një vend ku të dëgjohet fjala. Kemi një forum të fortë i cili ka vite që punon dhe nuk ka reshtur së punuari për kauzat e të rinjve dhe kjo falë mbështetjes së madhe që Ilir Meta dhe Lëvizja Socialiste për Integrim na ka dhënë. Unë jam futur në këtë garë miq me një vizion. Kam një model për drejtimin e këtij forumi rinor politik plot energji. Unë dua që çdo i ri në Shqipëri, çdo e re të ketë mundësi përfaqësimi dhe përkrahje për të ardhmen e tij. E shoh LRI si forca rinore e shtrirë nga Tropoja në Sarandë që mbledh rreth vetes të rinj dhe të reja dhe jep mundësi për t’u shprehur për të qenë politikanë, për të formësuar të ardhmen e tyre dhe qëndron përkrah çdo të riu për të luftuar çdo sfidë që i del përpara”, tha Kërpaçi.
Kandidati për kryetar të LRI-së, Klevi Pojani në fjalën e tij përpara pjesëmarrësve theksoi garat në LSI kanë qenë dhe do të jenë gjithmonë një qëllim për të sfiduar vetveten dhe për të përmirësuar.
“Në këtë garë për kreun e LRI-së ndihem besimplotë se përfundimi do të jetë fitorja. Ne jemi në një garë me më të mirët, prandaj nuk stepemi për t’u rritur dhe për t’u zhvilluar akoma më shumë. Unë kam bindjen që së bashku mund të arrijmë për të themeluar akademinë politike të LRI ku çdo i ri shkodran do të trajnohet për t’u bërë një lider në vizion dhe një politikan i denjë. Ndihem besimplotë se ne do të arrijmë të krijojmë një lidhje më të ngushtë midis rinisë së Shkodrës me të gjitha degët e tjera në Shqipëri që zëri ynë të bashkohet dhe të bëhet një zë më i fortë”, u shpreh Pojani.
Më pas anëtarët e LRI-së votuan edhe për kryetarin e tyre ku përballë ishin Eduina Ymeri dhe Marko Papleka. Pas procesit të votimit dhe numërimit transparent, Eduina Ymeri u zgjodh kryetare me 136 vota, ndërsa Paplekaj mori 82 vota.
