Kryemadhi: Rama, pacienti zero i COVID që përhap panik

419
Sigal

Kryetarja e LSI-së Monika Kryemadhi, e cila deklaroi se pacienti zero i koronavirusit në Shqipëri, është kryeministri Edi Rama.

Në një intervistë përmes Skype me emisionin “Kjo javë”, Kryemadhi tha se Rama del në media dhe përhap panik, ndërsa akuzoi dhe televizionet se bëjnë të njëjtën gjë. Me ironi Kryemadhi tha se më mirë është që në këtë kohë të shihen telenovelat turke.

Monika Kryemadhi: Qeveria dhe mediat të mos përhapin panik, qytetarët duan garanci

Nuk jam shumë dakord me këtë zonja Kryemadhi, sepse nuk është kështu…?

Jo jo ashtu është, por nuk ka problem. Megjithatë unë mendoj që gjëja e parë që duhet të bëni ju të gjithë dhe duke filluar nga pacienti zero i koronavirusit në Shqipëri, që është Edi Rama, është që të shmangni përhapjen e panikut te shqiptarët, sepse ajo është një nga gjërat kryesore që ul dhe rëndon imunitetin e shqiptarëve. E dyta, dy parafolësit e mi, që dolën pa radhë, sepse janë mësuar gjithë jetën të dalin pa radhë para njerëzve, të kuptojnë që duhet të bëjnë më shumë për njerëzit dhe për qytetarët. Siç bëjnë atë që është më e rëndësishmja për familjet e tyre, t’i quajnë edhe qytetarët e shtetasit e vendit të vet, të cilëve u marrin taksat një më një, tu shërbejnë me dashuri, me qetësi e me respekt.

Kush po e përhap panikun?

Qeveria e para. Qeveria dhe mediat të cilat janë kthyer në funksion të qeverisë. A e keni parë? Merreni e shikojeni se cili është paniku dhe terrori psikologjik që përhapet te njerëzit, kur është një gjë shumë e thjeshtë. Nëse kjo do të jetë një gjë kaq emergjente, mënyra sesi funskionon, mjafton të merrni dhe të shikoni të gjitha komentet dhe mënyrën sesi flitet, është vetëm panik, i cili dëmton jashtëzakonisht shumë nga ana psikologjike, të gjithë qytetarët, por sidomos shtresat në nevojë. Sepse paniku i mungesës së punës, paniku i mungesës së parasë, paniku i mungesës së një të ardhmeje të garantuar, çfarë sjell tjetër? Sjell stres. Po stresi çfarë sjell? Ulje të imunitetit. Ulja e imunitetit çfarë sjell? Zhvillimin dhe kapjen sa më lehtë të njerëzve nga koronavirusi. Kjo është e gjitha. Këtu po të shikosh të gjitha televizionet, hapi të gjtha nga 1-121, i ke të gjitha me panik e terror. Njerëzve duhet t’u jepet garanci, duhet t’u jepet qetësi dhe garancinë kryesore të funksionimit të shtetit që u shërben qytetarëve. Jo që shteti i shërben një njeriu të vetëm. A mund të japim disa mesazhe dhe ide më pozitive për njerëzit? Sepse mendoj që njerëzit kanë 4 javë që dëgjojnë helm nga mëngjesi deri në darkë, janë më mirë telenovelat turke që të shikojnë shqiptarët, sesa deklaratat për shtyp që bën qeveria.

Zonja Kryemadhi, si po menaxhohet situata tani kur thuhet se është piku i javës me koronavirus?

Unë nuk kuptoj një gjë, pikun e koronavirusit të qeverisë tonë, sepse kjo është java e katërt. Sipas qeverisë tonë duhet ta kishim kaluar para dy javësh. Kështu që mendoj se këto janë të gjitha një lloj mungese jo vetëm të informacionit, por edhe të menaxhimit të të gjithë kësaj situate. Nuk kam dalë dhe nuk kam ndërmend të merrem sesi duhet të organizohet dhe menaxhohet kjo gjë. Mendoj se duhet një lloj ndershmërie dhe sinqeriteti, të paktën nga ai staf mjekësor, i cili i qëndron afër institucioneve të qeverisë. Nuk kam parë asgjë që mund të ketë diçka pozitive që është bërë nga të tjerët. Ajo që është më e rëndësishme është vetë izolimi që qytetarët bëjnë dhe marrja e masave nëpërmjet vetë karantinimit të tyre, apo zbatimit të disa rregullave të cilat në njëfarë mënyre mund të kenë parandaluar përhapjen, por kjo nuk do të thotë që kemi një lloj garancie.