Këshilltarët e djathtë në Këshillin Bashkiak të Tiranës kanë akuzuar kreun e Bashkisë së Tiranës Erion Veliaj se ka kryer dy vepra penale Falsifikim dokumentash dhe shpërdorim detyre.
Nëpërmjet një deklarate për mediat nga selia blu, këshilltari Fabian Topollaj ka kërkuar hetim të shpejtë për Veliajn.
Deklarata e plotë e këshilltarit Fabian Topollaj
Drejtori i Edi Ramës në Bashkinë e Tiranës, Erion Veliaj, ka konsumuar dy vepra të rënda penale në një ditë;
Falsifikim dokumentash dhe shpërdorim detyre.
Kurajoja dhe integriteti i inspektorit Besmir Karaj, zbuloi shkeljet e rënda të Veliajt, në përpjekjen e tij të dëshpëruar për të fituar simpatinë e shefit të tij, duke i vendosur gjobë popullit protestues.
Deri dje, akti i Veliajt ishte komik dhe qesharak, dhe mbarë opioni publik janë tallur me të.
Por nga dje, rezulton se kemi të bëjmë me shkelje serioze të ligjit, dhe me dy vepra të rënda penale, falsifikim dokumentash dhe shpërdorim detyre.
Tashmë në prokurorinë e Tiranës ka një kallëzim penal të kryer nga inspektori Karaj.
Ne i kërkojmë prokurorisë të hetojë me shpejtësi dhe të nxjerrë përgjegjësitë e Veliajt para ligjit.
Çdo qytetar i vendit do të ishte pas hekurave tani me këto dy vepra penale, të provuara tashmë publikisht.
Prokuroria ka rastin të tregojë se ligji funksionon për të gjithë, dhe se Erion Veliaj, nuk ka imunitet kur falsifikon dokumenta e shpërdoron detyrën.
Abuzimi i drejtorit të Ramës në Bashki, është një prej padrejtësive që shkakton kjo mazhorancë që e sollën popullin në Protestën madhështore të 8 dhjetorit.
Protestë që do të rritet e nuk do të ndalet derisa klika e korruptuar që nëpërkëmb ligjin si ti dojë qejfi, të largohet, e vendit ti hapet një rrugë e re.
