Kancelari austriak kërkon hapjen e negociatave për Shqipërinë, ja çfarë thotë për Ballkanin

619
Sigal

“Me Shqipërinë dhe Maqedoninë duhet të hapim shpejt negociatat”, është shprehur kancelari austriak, Sebastian Kurz për gazetën gjermane “Welt am Sonntag”.

Kancelari i Austrisë, Sebastian Kurz kërkon hapjen e shpejtë të negociatave të anëtarësimit për Shqipërinë dhe Maqedoninë. “Kush kërkon të mënjanojë konfliktet në fqinjësinë tonë në Ballkanin Perëndimor dhe do të kontribuojë për stabilizimin, ai duhet t’u ofrojë një perspektivë të besueshme europiane vendeve në rajon”, ka thënë politikani austriak për gazetën gjermane “Welt am Sonntag.”

Austria mbështet Serbinë dhe Malin e Zi që kanë bërë përparime në pjekurinë për anëtarësim. “Edhe me Shqipërinë dhe Maqedoninë duhet të fillojmë të hapim negociatat”, tha Kurz, shkruan Deutsche Welle.

Samiti i qershorit do të vendosë, nëse do të hapen negociatat me Shqipërinë dhe Maqedoninë. Në Gjermani, sidomos në partinë konservatore, CDU dhe CSU, por edhe në disa vende të BE-së ka ende rezerva për këtë hap. Por Komisioni Europian e mbështet hapjen e negociatave për Shqipërinë dhe Maqedoninë.