Halimi: S’mund të ketë parlament, me deputetë kriminelë

495
Pas votimit të akteve nënligjore për ligjin e Dekriminalizimit, nënkryetari i grupit parlamentar demokrat, Eduard Halimi, tha se Partia Demokratike nuk qëndron në një Parlament që ka deputetë të cilët kanë plagosur qytetarë. Sikundër ishte paralajmëruar edhe më herët, Partia Demokratike bojkotoi punimet e Kuvendit, deri në largimin e Armando Prengës nga Parlamenti.
“Opozita kërkon largimin efektiv të deputetit Prenga. Nuk ka akoma një akt të pastër ligjor që të ndalojë deputetin Prenga të vijë dhe të votojë ministrat në Kuvend. Ju thyet vendimin e Kushtetueses, e cila rrëzoi Parlamentin për fshehjen e deputetit që ka marrë fonde publike. Kushti i tretë i marrëveshjes së 24 dhjetorit kishte të bënte me funksionimin e Komisioneve Hetimore. Ne kemi dërguar sot nisma konkrete për ti plotësuar këto kushte. Këto nisma janë që deputetët që kanë plagosur, të mos rrinë më në këtë Parlament. Pa u plotësuar këto kushte, opozita nuk do vazhdojë të rrijë më në Parlament”, tha Halimi përpara se deputetët e opozitës të largoheshin nga salla e Kuvendit. 
” “Çështja e parë dhe më kryesore për të cilën opozita u kthye në parlament kishte të bënte me dekriminalizimin dhe largimin efektiv të deputetëve me rekorde të tmerrshme kriminale nga parlamenti. Ky proces në mënyrë të padiskutueshme duhej të përmblidhej bashkë me ligjin, instrumentat dhe me largimin efektiv të deputetëve me rekorde kriminale. Të gjithë shqiptarët e dinë shumë mirë se si u pengua ligji për dekriminalizimin për një vit e gjysëm rresht dhe aktet që u miratuan sot duhej të ishin miratuar 3 muaj më parë, por ajo që ndodhi kishte të bënte edhe me ardhjen këtu në parlament të një deputeti i cili gjakosi qytetarët shqiptarë të pafajshëm në derën e komisariatit të policisë. Ky është kusht i pasdiskutueshëm që opozita të vazhdojë një jetë parlamentare normale, largimi efektiv i deputetit Prenga i cili erdhi në seancën e kaluar për të votuar ministrat e qeverisë dhe nuk ka akoma një akt të pastër ligjor që të ndalojë përfundimisht deputetit Prenga të vijë këtu në parlament.
Kushti i dytë i marrëveshjes së 24 dhjetorit kishte të bënte me ekzekutimin e vendimit të Gjykatës Kushtetuese. Ajo që ndodhi 2 ditë më pare, ishte se u injorua vendimi i Gjykatës Kushtetuese. Precedenti i rastit Kokëdhima kishte të bënte me një shkelje të dytë të marrveshjes së 24 dhjetorit dhe kjo është një çështje e padiskutueshme për një marrdhënie normale në parlament. Thyhet vendimi i Gjykatës Kushtetuese e cila urdhëronte Parlamentin që mos tia fshehë drejtësisë deputetët që kanë përfituar fonde publike. Deri në ekzekutimin e këtij vendimi të Gjykatës Kushtetuese në mënyrë të padiskutueshme, marrëveshja e 24 dhjetorit është duke u shkelur. Ashtu si kushti tjetër i tretë i marrëveshjes së 24 dhjetorit kishte të bënte me funksionimin normal të komisioneve hetimore parlamentare të cilat gjatë gjithë kësaj kohe janë penguar dhe vazhdojnë të pengohen.
Ndaj për të treja këto kushte, Partia Demokratike ka depozituar sot nisma konkrete ligjore, kërkesa konkrete të cilat duhet të materializohen në mënyrë të shpejtë. Në mënyrë që deputetët me rekorde të tmerrshme kriminale, deputetët që gjakosën qytetarët e thjeshtë në dyert e komisariatit të mos shkelin më në parlament, në mënyrë që deputetët të cilët përfitojnë fonde publike duke patur kostumin e deputetit nuk duhet të rrinë as edhe një minutë këtu në parlament. Në mënyrë që komisionet hetimore të opozitës të cilët zbulojnë të gjitha aferat e qeverisë, të jenë efektive. Pa u bërë dhe pa u plotësuar këto kushte opozita nuk mund të vazhdojë të rrijë më në këtë parlament”.​
Sigal