Shpesh mendoj se anormalja është ulur këmbëkryq në këtë vend, kurse arsyeja ka marrë arratinë. Sot lexova se një megafon dhe shërbëtor pushteti, analist me emër e flokë të bardha, që nuk le studio pa dalë e pa sharë lidershipin opozitar të djeshëm dhe të sotëm, ankohej se ndihej i rrezikuar. Këta palo intelektualë vazhdojnë me avazin e rrezikut që u kanoset njerëzve nga opozita, kurse për babëzinë e pushtetit asnjë fjalë. Gazeta, studio, portale, e kudo ku munden, shajnë e nxijnë ata që nuk kanë asgjë në dorë në këtë vend. Pastaj fillojnë me hamendësimet: “radhëm e ka ky, pastaj ai, pastaj në burg…”. Tërë siguri dhe kapadaillëk bëjnë biografi e sentenca me “urdhër nga lart”!
Shqipëria duket e ndotur mediatikisht më shumë se kurrë. Ca “të pavarur”, të varur për xhepash te pushteti, fillojnë e qajnë halle antieuropianizmi e antiamerikanizmi, përmes tezave që veç ata e dinë se ku i gjejnë dhe si i sajojnë. Po për aq kohë sa i duhen të Madhit, opozitarët duhen shpallur armiq të aleatëve tanë. Qytetarët helmohen përditë nga këto rrëgime e përbetime, aq sa ka prej atyre që me naivitet fillojnë e përsërisin ato që dëgjojnë. Veshëve u duhen armiq, sto po ju servirin të tillë. Askush nuk merret me të vërtetat e hidhura: me korrupsionin, abuzivizmin e pushtetit, tjetërsimin e votave ditën për diell, braktisjen e vendit, kriminalitetin e trafiqet.
Popullit i duhen amiq, fajtorë e njerëz që duhet të paguajnë për hallet që na kanë zënë. Pasi ti heqim të gjithë, ata do të nxitojnë të thonë: “rroftë mbreti”! Po paskëtaj, shërbëtorët e sotëm të pushtetit mund të jenë armiqtë e mbretit?! Ndodh, por mendjeshkurtrit nuk e kanë menduar këtë mundësi. Ma merr mendja që mund tu ngjasë të bien në gropën që hapën vetë. Ndaj ka ardhur koha që ti zbresin kuajve mediatikë që po ngasin e ti thërrasin arsyes, tu tregojnë shqiptarëve të vërtetën dhe të jenë të balancuar. Mbase kjo nuk u ndodh, por nëse kanë pasur ndonjë betejë morale në jetë shpresoj që ta kenë për demokracinë dhe për kombin.
