Në një ceremoi të zhvilluar në përkujtim të 113 vjetorit të Kongresit të Elbasanit ka mbajtur fjalën edhe Sekretari i Përgjithshëm i Partisë Socialiste Damian Gjiknuri. Drejtuesi politik i këtij Qarku shprehet se kjo është një ditë simbolike, që nuk duhet harruar dhe ja vlen të kujtohet. “Kjo ditë vlen të kujtohet jo për faktin se ne nuk e dimë se çfarë është Kongresi i Elbasanit apo rëndësinë e tij, por për të dhënë mesazhin që edhe hapat e vegjël në momentet kyçe kanë rëndësi, se gjuha është elementi bazë i një populli. Se kombet mund edhe të zhduken pas rënies së një Perandorie, por e ka mbajtur gjallë pikërisht lëvizja e këtyre njerëzve për të unifikuar gjuhën, për ta formalizuar për ta kthyer në gjuhë të shkruar e për t’u rrethuar pranë gjuhës duke përfaqësuar identitetin. Këto mund të duken si të kaluara, por në fakt arsimi është njësia bazë jo për themelin e kombit, por për mendimin tim edhe të zhvillimit. Elbasani duhet të jetë krenar. Edhe ministrja e arsimit është nga Elbasani për origjinën dhe kontributin që ka në arsim e meritonte që të përfaqësohej në nivelin më të lartë qeveritar dhe Evisi e justifikon çdo ditë punën e saj duke e krenuar Elbasanin.” Ndër të tjera Sekretari i Përgjithshëm i PS deklaroi: “Së bashku duke i dhënë prioritet arsimit ne do ta bëjmë Shqipërinë më të mirë dhe sidomos Elbasanin me investime në shkolla dhe në universitet dhe mbi të gjitha me reformat e nevojshme, që po ndërmerr qeveria dhe Ministria e Arsimit për përmirësimin e arsimit në tërësi. Arsimi nuk është godina e shkollës, arsimi është përmbajtja është cilësi, është aftësia e mësimdhënësve tanë dhe mundësitë që jep qeveria edhe për kërkimet shkencore me qëllim që ne vërtet të konkurrojmë me hapin e kohës. Mendoj dhe besoj se jemi në drejtimin e duhur.”