Arben Ristani, një nga kundërshtarët më të fortë të Lulzim Bashës, deklaron se edhe një fitore që ka në karrierën e tij Lulzim Basha, ka qenë ai aty.
I ftuar mbrëmë në emisionin ‘Dekalog’ të gazetarit Roland Qafoku në RTSH 24, Ristani tha se megjithatë vendimi ishte i drejtë, porse ishte ai aty, duke lënë më shumë për të nënkuptuar një lloj mosmirënjohje.
Por pas një procesi rinumërimi në kutitë e votimit me arsyetimin se disa vota ishin hedhur në kuti të gabuara, Komisiuoni Qendror i Zgjedhjeve, me 4 vota pro dhe 2 kundër, vendosi të shpallë Bashën fitues me 81 vota më shumë se Edi Rama.
Kryetar i KQZ në atë kohë ishte Arben Ristani. Në vitin 2013, pasi Basha u zgjodh kryetar i PD, Arben ristani u zgjidh sekretar i Përgjithshëm i PD, post që e mbajti për katër vjet.
Ristani ka qenë gjatë kësaj kohe një nga kritikët më të fortë ndaj Bashës për mënyrën se si po e drejton PD. Në zgjedhjet parlamentare të 25 prillit të këtij viti, Ristani nuk u përfshi nga Basha në listat e kandidatëve për deputet. Më poshtë, pjesë nga deklaratat e zotit Ristani bërë në emisionin ‘Dekalog’.
Zoti Ristani, në vitin 2011 ju, në cilësinë e kryetarit të KQZ-së keni dhënë vendimin që Basha të shpallej kryetar i bashkisës së Tiranës pas një procesi të hapjes së kutive dhe rinumërimit të votave. Sot, nëse do ishit në atë pozitë, do ta jepnit sërish atë vendim?*
Së pari, nuk është vendim personal, por është vendim kolegjial. KQZ është komision kolegjial. Tani ka ndryshuar pak, por në atë kohë ishte kolegjial.
Së dyti, do ta jepja po atë vendim jo një herë por një qind herë. Ose sa herë ta kisha mundësinë. Sepse ishte me të drejtë. Unë kam patur vetëm një vërejtje në atë kohë nga OSBE-ODIHR që ishte për procedurë. Për procedurë kishte dy mundësi.
Përpara se të deklarohej fitorja, ose pasi të deklarohej fitorja. Vota në kutinë e gabuar është aq e vlefshme për të qenë ai vendim që unë kam marrë dhe u konsiderua e vlefshme, saqë më pas u bë pjesë e legjislacionit.
Sot që keni kaq shumë kritika ndaj Lulzim Bashës nuk thoni ç’kam bërë?
Nuk ka të bëjë me atë punë. Por që ka vlejtur, që Basha edhe një fitore që ka në jetë, paskam qenë edhe unë aty.
Por ia ke dhënë ti.
Jo. Ia ka dhënë ligji. Jo unë.
