Në konferencën e përjavshme për mediat, nga selia e Partisë Demokratike lideri historik i saj Sali Berisha nxorri disa dritëhije të tjera skandali. “Çfarë kanë zbulimet e fundit?!” – tha duke pyetur Berisha. Më tej ish-kryeministri shqiptar tha se ekzistojnë në SPAK mesazhe dhe e-maile ku kryebashkiaku urdhëronte kryerjen e disa pagesave. “Zbulimet e fundit faktojnë atë që u kam deklaruar ju në mënyrë të vazhdueshme. Ndërmarrja është e Erion Veliajt. Sot, në dosjen e SPAK ekzistojnë mesazhe, emaile, në të cilat pronari i djegësit që nuk ekziston, Erion Veliaj, urdhëronte Mërtirin t’i jepte 200 mijë euro Karlo Bolinos, 100 mijë euro Fugës, 100 mijë euro Blushit. Lista vazhdon, por po ndalem me këta të tre. Pra, ishte ky pronari i parë që urdhëronte se kaq para t’i jepen këtij apo atij. Kjo është e vërteta! Pse e thashë këtë këtu? E thashë këtë së pari në mbështetje të tezës se unë kam shtruar se sipërmarrja nuk mund të jetë kurrë Mërtiri-Zoto. Kjo nuk mund të ndodhë kurrë. Mua më kanë thënë edhe përqindjet e aksioneve të Veliajt. Por unë po rezervohem.” – tha Berisha. Si të mos mjaftonte kjo deklaratë e fortë, Berisha tha se në SPAK sipas tij ka tentativa për të zhdukur fashikuj të dosjes. Berisha: “Këtë njoftim e bëra se po bëhen tentativa për të zhdukur fashikuj në dosjen e SPAK-ut. Nëse aty ka prokurorë të ndershëm, ta kyçin me tre çelësa këtë dokument në kasafortë, që fakton në mënyrën më përfundimtare pronësinë e djegësit të Tiranës. Ta kyçin, madje ta shpërndajnë fotokopje.” – tha të premten Sali Berisha.
