Endi Laci
Letër e Hapur Zonjës Anila Denaj, Ministre e Financave
A është i vërtetë fakti i dënimit të shtetit tonë me shuma të mëdha financiare?
E nderuar Zonja Ministre, duke patur parasysh pozitën tuaj zyrtare, -Me njohuri që keni punuar në institucione ndërkombëtare që e kanë transparencën një nga parimet bazë të komunikimit me publikun, -Me mendimin se e drejta dhe sinqeriteti është një vlerë e juaja, Po ju drejtohem për një problem që me siguri nuk eshtë thjesht një shqetësim personal: Është folur jo vetëm në shtyp për një dënim financiar të qeverisë tonë nga ana e gjykatave ndërkombëtare për veprime abuzive në dëm të personave privatë apo kompanive të huaja. Po shtroj disa pyetje:
1.A është i vërtetë fakti i dënimit të shtetit tonë me shuma të mëdha financiare?
Kush do t’i shlyejë këto detyrime?
2.Këto vendime që kanë rezultuar të dënueshme janë individuale, apo kolegjiale?
- A duhet të këtë penalizime për individë apo një grup personash që kanë shkaktuar këto dëme financiare?
- Thuhet se institucione financiare do të sekuestrojne pasuri te shtetit tonë në vende të ndryshme të botës. Me sa jam ne dijeni, si shtet ne kemi në zotërim 3 apo 4 godina ambasadash dhe ndoshta ndonjë depozite valutore në ndonjë bankë. A e mbulojne vlerën që detyrohemi të paguajmë këto pasuri?
Kemi patur një histori të hidhur si shtet në vitin 1946, me mbytjen e dy anijeve angleze në kanalin e Korfuzit nga minat qe ishin vënë nga pala jonë. Edhe atëherë një gjykatë ndërkombëtare e dënoi shtetin tonë dhe për 45 vite, Anglia bllokoi floririn tonë në bankën e Londrës që ishte marrë nga Gjermanët nga Banka shqiptare. Për shumë vite ne kishim mësuar se këtë flori e kishte “Vjedhur” Mbreti Zog, kur në fakt, floriri ishte në bankë deri sa e rrëmbyen gjermanët. Në vitin 1995, qeveria shqiptare e njohu dëmin ndaj anglezëve dhe amerikanëve (për sekuestrimin e pronave të qytetarëve amerikanë në Shqipëri) dhe nga floriri i bllokuar iu kthye të dëmtuarve sasia që ishte caktuar nga gjykata nderkombëtare dhe ajo që na mbeti “u katandis kokoshi një thelë”.
- A mendoni se ky borxh duhet kthyer nga ata që e kanë vjedhur këtë vend për 30 vite dhe mund të kenë pasuri të fshehura në parajsa fiskale?
