Gjovalin Valça: “Nëse një fëmijë nuk ushqehet mirë as ilaçet që unë i jap nuk i bëjnë efekt, kot ia jap antibiotikët”
Në spitalin e Mirditës fëmijëve të shtruar në repartin e pediatrisë u jepet për mëngjes, çaj, gjalpë, djathë dhe reçel, dreka fasule dhe në darkë makarona. Menuja nuk ndryshon për ditë të tëra dhe përveç kësaj, këtij spitali në shumicën e rasteve i ikin dritat. Në dimër situata vështirësohet dhe në shumë raste shërbimi u jepet pacientëve me qiri.
“Fiks Fare” solli mbrëmjen e së martës menunë që u serviret fëmijëve në spitalin e Mirditës ku u ofrohen për mëngjes të njëjtat gjëra si të rriturve, bukë me gjalpë dhe çaj. Gazetarët e “Fiksit” treguan me anë të pamjeve dhe dëshmive të shumta se menyja në këtë spital është e njëjtë për të gjithë pacientët, pa patur parasysh moshën e tyre. E ëma e një fëmije 5 muajsh tregoi se për fëmijën e saj kishin çuar çaj dhe bukë me gjalpë. Ndërkohë një tjetër nënë që kishte fëmijën e shtruar, tregoi se në drekë ka fasule dhe darkë makarona.
Edhe pse në fillim infermieret e pediatrisë i pohojnë gazetarit të “Fiks Fare” se fëmijëve të moshës nga 0-1 vjeç u jepnin në mëngjes qumësht, biskota, muhalebi. Por infermieret demaskohen shumë lehtë kur gazetarja kërkon të shohë këto ushqime dhe kryeinfermierja përgjigjet, “sot nuk e kanë patur në meny”. Gazetarja e “Fiks Fare” për të vërtetuar ankesën e nënave shikon dhe në magazinën e kuzhinës së spitalit, ku magazinieri për tre ditë rresht ka bërë dalje vetëm gjalpë, reçel e djathë. Ai justifikohet: “këto kanë mbetur se është në përfundim kontrata me furnizuesin”.
Shqetësim tjetër për prindërit ishin edhe energjia elektrike në spital. Ata thanë se dritat ikin shumë shpesh duke e kthyer në një problem të madh të ftohtin.
Të njëjtat shqetësime me prindërit ndau edhe shefi i pediatrisë në Spitalin Rajonal të Mirditës , i cili tregoi se çdo ditë gjen mbi komodinat në dhomat e fëmijëve, djathë dhe reçel ose çaj dhe gjalpë. “Nëse një fëmijë nuk ushqehet mirë as ilaçet që unë i jap nuk i bëjnë efekt, kot ia jap antibiotikët” thotë mjeku Gjovalin Valça. Ai tregon se problemet në këtë spital janë të mëdha, Një problem sipas tij janë edhe dritat, të cilat ikin shpesh dhe ai është i detyruar të japë shërbimin nën dritën e qiririt.
Gazetarët e “Fiksit” shkuan edhe tek drejtori i institucionit, Edmond Karrica, i cili tha se kuota për fëmijët është vetëm 150 lekë, kjo e miratuar prej vitesh nga Ministria e Shëndetësisë. “Unë nuk jam në dijeni që kanë munguar të gjitha produktet për fëmijët nga 0-1 vjeç, ndaj për këtë do pyes kryeinfermieren dhe do e verifikoj” shprehet z. Karrica. Për sa i përket ikjes së energjisë ai tha se ka bërë të gjitha përpjekjet me OSHEE-në dhe Drejtorinë e Tensionit të Mesëm, por akoma nuk ka marrë një përgjigje përfundimtare.
Bisedë e zhvilluar në Repartin e Pediatrisë
Gazetarja: Sa muajsh është?
Prindi 1: 5 muajsh.
Gazetarja: Për këtë fëmijën ty të kanë sjellë atë bukën?
Prindi 2: Bukë e çaj e asgjë tjetër, grosh në drekë, asgjë fare.
Prindi 3: Ja kështu është këtu.
Prindi 2: As ka nxemje as, asgjë fare. Problemi është kështu, bukë çaj, në drekë grosh, në darkë makarona ato nuk futen në bark, a i sjellin a nuk i sjellin.
Gazetarja: Po ndonjë frutë? Ndonjë gjë?
Prindi 3: Jo, jo, jo
Gazetarja: Po dritat ikin ndonjëherë?
Prindi 2: Ikin dimrit më shumë, dimrit fik -ndiz, fik -ndiz, dimrit është më katastrofë,
Kryeinfermierja: 0-1 vjeç ka edhe qumësht me biskota, bëjmë edhe muhalebi.
Gazetarja: Ku janë këto që më tregon? Ku është qumështi, biskota dhe muhalebia? Mund të na i tregoni?
Kryeinfermierja: Jo sot nuk ka për shembull.
Gazetarja: Po përse, aty ishte një fëmijë 5 muajsh.
Kryeinfermierja: Po, një bebe.
Prindi : Jo qumësht fare këtu tek ne, vetëm çaj sollën.
Gazetarja: Sot në mëngjes për shembull çfarë ka patur? Çfarë është shpërndarë sot në mëngjes?
Magazinieri: Po, sot në mëngjes ke patur gjalpë edhe çaj, ja ku është edhe gjalpi.
Gazetarja: Po dje?
Magazinieri: Po ja shikoje dhe dje, gjalpë ka patur dhe dje se është përfundimi i kontratës.
Gazetarja: Dhe çaj.
Magazinieri: Po, po.
Gazetarja: Dakord, pardje, ka qenë mëngjesi çaj, gjalpë, 3 ditë u bënë
Magazinieri: Po edhe ashtu vazhdojnë të gjitha. Është përfundimi i kontratës, vetëm gjalpë, reçel ka.
