Mediat e huaja i kanë bërë jehonë ngjarjes së ndodhur në Durrës, ku kamarieri 18-vjeçar, Genti Nela, u dhunua nga pronarët e hotelit. Gazeta greke,’Protothema’ shkruan se ky rast po merr përmasa serioze, pasi dëshmia e të riut dhe videoja e dhunës hedhin dritë mbi aspekte të ndryshme të incidentit.
Në artikull shkruhet se e gjitha filloi kur 18-vjeçari kërkoi pagën tij dhe kishte njoftuar pronarët se të linte punën, pasi kishte gjetur një punë tjetër. Sipas dëshmisë së Nelës, ai kishte filluar të punonte në hotel më 10 korrik 2026. Ai tha se kishte diskutuar çështjen e punës me Florian dhe Arber Habilaj dhe kishte marrë rrogën e tij të parë më 10 gusht.
Më 27 gusht, sipas dëshmisë së tij, ai kërkoi paratë që i detyroheshin, pasi kishte vendosur të linte punën specifike dhe të punonte diku tjetër. 18-vjeçari pretendon se fillimisht u fye dhe më pas ata e sulmuan fizikisht. Në dëshminë e tij, Nela përshkruan se Florian Habilaj fillimisht e goditi me grusht, e më pas, Arber Habilaj e goditi në kokë dhe fytyrë.
Në dhunën ndaj të riut, u përfshi edhe Enold Dragoti. Nela gjithashtu pretendon se gjatë sulmit ai mori kërcënime për jetën e tij dhe se ata që ishin të përfshirë thuhet se i thanë se do ta vrisnin dhe do ta zhduknin. 18-vjeçari thotë gjithashtu se u përpoq të mbrohej dhe të largohej. Sipas dëshmisë së tij, ai mori një gotë dhe e goditi Florian Habilajn në kokë.
Më pas arriti të largohej nga hoteli dhe të ikte me vrap. Megjithatë, sipas dëshmisë së tij, të katër burrat e ndoqën dhe i bllokuan sërish rrugën. Në pamjet e publikuara, shihet një pjesë të sherrit, por jo pjesa brenda hotelit. Pamjet tregojnë 18-vjeçarin duke vrapuar jashtë hotelit, duke u përpjekur të largohej dhe katër persona që e ndjekin nga pas. Në një moment, ai ndalet, kthehet dhe e godet me grusht Florian Habilajn, i cili bie përtokë.
Menjëherë pas kësaj, sipas pamjeve filmike, katër personat vazhdojnë ta dhunojnë. Por ajo që tërheq vëmëndje është fakti se kamerat brenda hotelit nuk kanë regjistruar atë që ka ndodhur më parë. Sipas hetimeve, kur autoritetet kanë mbërritur në vendngjarje, zbuluan se pajisja e regjistrimit nga kamerat ishte hequr dhe kabllot ishin prerë. Gjykata e Durresit vendosi të mbajë në paraburgim përkohësisht Florian Habilajn dhe Enold Dragoti për 45 ditë.
