Në Kuçovë uji sigurohet si në mesjetë, banorët e mbushin në burime: Shteti na ka braktisur, vijnë vetëm për vota!

421
Sigal

Banorët e lagjes “Fermë Çlirim” në Kuçovë thonë se prej tetë vitesh detyrohen ta sigurojnë ujin e pijshëm si në mesjetë duke e mbushur në burime e transportuar me krah apo kafshë.

Puset nuk janë zgjidhje në këtë zonë pasi toka është e pasur me naftë dhe uji del i ndotur.

Rreth 80 familje të lagjes “Fermë Partizani” në qytetin e Kuçovës nuk furnizohen me ujë të pijshëm prej 8 vjetësh, ndërsa paguajnë faturat afrofe.

Në këto kushte ata detyrohen ta sigurojnë ujin në burime të tjera, nga ku e mbajnë me krah, kafshë barre apo duke paguar mjete transporti.

Brenda oborreve të shtëpive në të gjithë zonën duken qartë bidona, kova e fuçi, ndërkohë që në rubinetet e çezmave të tyre nuk rrjedh ujë.

“Po mbushim nëpër bote. E blejmë ujin për tu larë, na ka braktisur shteti, vijnë vetëm për vota,”-u ankua njëri prej banorëve.

Një pjesë e banorëve kanë hapur puse, por uji që del prej tyre nuk pihet pasi vete lagja është zonë naftëmbajtëse.

Banorët thonë se kjo situatë vijon prej vitesh dhe pavarësisht ankesave nuk po merr zgjidhje.

“Kemi lajmëruar ndërmarrjen në komunë, vjen drejtori dhe e shikon që nuk kanë ujë çezmat dhe thotë nuk kemi çfarë të bëjmë.”

“Prej 4-5 vjetësh jemi pa ujë nga maji në tetor. Gjatë kohës që nuk ka ujë, faturat na vijnë te shtëpia.”

Të pyetur në lidhje me këtë shqetësim, drejtues të sh.a Ujësjellës-Kanalizimeve Berat-Kuçovë thonë se rrjeti mund të ketë pësuar dëmtime edhe nga vetë banorët që tentojnë të përdorin ujin e pijshëm për vaditje në verë.