Një mësues gjimnazi në Shënkoll të Lezhës dhe dy persona të tjerë përfunduan në pranga, për shkak se shpërndanin lëndë narkotike në shkollë. Sipas policisë lokale, mësuesi i gjimnazit Fatmir Ndreca, 46 vjeç, punonte si arsimtar në shkollën e mesme të Shënkollit dhe nxënësve me sa duket përveç dijeve, u shpërndante edhe lëndë narkotike.
Të paktën, këtë pretendon policia lokale, e cila sqaron se përveç mësuesit, ka arrestuar edhe dy persona të tjerë, përkatësisht Sabri Zyba, 24 vjeç, dhe Petrit Gjoka, 41 vjeç. Operacioni i koduar “Arbeit”, bëri të mundur sekuestrimin e një sasie prej 340 cigare brenda të cilave ishte kamufluar lënda narkotike marijuanë. Gjithashtu, janë sekuestruar edhe 555 doza lëndë narkotike e dyshuar kanabis sativa, 56 (kubik) të dyshuara si bimë narkotike të kultivuara në gota plastike, 1 automjet Mitsubish, 4 celularë dhe 1 armë gjahu me leje. Materialet procedurale do t’i kalojnë Prokurorisë së Rrethit Gjyqësor Lezhë për veprime të mëtejshme.