Me rastin 5 dhjetorit, ditëlindjes së autorit të ciklit

 Plepa të zverdhur.

Gjethe të shtruara mbi rrugë.

Duke shkelur mbi gjethet e verdha po vij.

Çfarë surprize, moj e dashur,

Ti ma paske shtruar rrugën me flori?

PRANVERË

Sythi shkrin dëborën me zjarrin e lules

Lulja pohon pranverën,

Lidh frutën

Dhe bie me nderim.

Toka e pret me blerim.

S’MË PRITET

Rruga nga ti

Tek unë,

Dritë qumështi hënor.

Rruga nga unë

Tek ti,

Errësirë,

Bitum i zi.

Ty s’të bëjnë këmbët të vish tek unë

Mua s’më pritet gjersa të vi vetëtimë tek ti…

TRANSPARENCË

Nuk lulëzojnë lule të zeza

Mbi pemë,

Mbi pjeshkë,

Mbi lëndina.

Nuk i fut të zezë pranverës natyra.

KOHË KORRJESH

Kohë korrjesh.

Natë.

Yjet si kokrra gruri

Përhapur qiellit lart.

Mes grunjërash

Kombajnat pushojnë,

Kombajnerët të shtrirë mbi kashtë

Kashtën e Kumtrit shikojnë.

Kashta e Kumtrit,

Rruga e Qumështit.

Na thuaj, o Mete, diçka,

Ti i di këto,

Ti lexon gjithçka!

Historia e «Kashtës së Kumtrit»,

Historia e «Rrugës së Qumështit»?

Herkuli

Gjirin e Erës piu,

U kënaq,

U ngop,

Pikat e qumështit pastaj

Prej sisës së Erës

Pi-

                ku-

                        an-

           Dhe «Rrugën e Qumështit»

Nëpër qiellin e natës formuan.

Përralla, shoku Mete!

Shpjegime fantastike,

Shpjegime përrallore,

Mitologjike!

Ajo vazhdë yjore,

Ajo rrugë yjore e bardhë,

Që qiellit zbardh netëve të vona,

Është kashta e grurit, o Mete,

Kashta që kanë lënë prapa kombajnat tona.