Certifikohen 29 të burgosura, Klosi: Dënimi i përket së shkuarës, profesioni së ardhmes

    212
    Ministri i Mirëqenies Sociale dhe Rinisë, Blendi Klosi ka shpërndarë sot certifikatat profesionale për 29 të burgosura që vuajnë dënimin në Institucionin e Ekzekutimit të Vendimeve Penale, Vaqarr, dhe që kanë ndjekur kurset pranë Qendrës së Formimit Profesional Nr.4 në Tiranë. Në ceremoninë e organizuar me këtë rast në ambientet e kësaj Qëndre, merrte pjesë edhe zëvendësdrejtori i Përgjithshëm i Burgjeve, Bledar Skënderi. Në fjalën e tij të rastit, ministri Klosi theksoi se është detyrë e institucioneve shtetërore që personat që vuajnë dënime në burgje t’i edukojnë dhe t’i bëjnë ata të gatshëm për të qenë nesër sërish qytetarë të denjë të shoqërisë. Ndaj, ka theksuar ministri, këto kurse që po kryhen falë një marrëveshjeje me Ministrinë e Drejtësisë, synojnë pikërisht që t’iu japin individëve që vuajnë dënimet në IEVP, mundësinë që të marrin një profesion, i cili do t’u shërbejë në momentin që do mbarojnë dënimin.
    “Nëpërmjet trajtimit në këto qendra të formimit profesional, ne kemi arritur që disave prej jush t’u japim gjatë këtyre ditëve të dënimit një zanat më shumë, një eksperiencë më shumë të punës dhe për të qenë të gatshme për t’u riaktivizuarnë jetën tuaj të përgjithshme. Dënimi që ju keni marrë ka qenë i së shkuarës, ndërsa trajnimi që keni marrë në qendrat e formimit profesional është një gjë që i takon së ardhmes suaj”, – u shpreh ministri Klosi në fjalën e tij. Më tej ai theksoi se angazhime të tilla i vijnë në ndihmë këtij grupi shoqëror për t’u dekriminalizuar dhe që nëpërmjet punës të ndjehen sërish pjesë e barabartë e shoqërisë. “Këto kurse vijnë në kuadër edhe të gjithë këtij diskutimi të madh për dekriminalizimin e shoqërisë shqiptare, pasi nëpërmjet punës dhe edukimit ky grup shoqëror do ketë mundësi të jetojë me punë të denjë dhe të bëhet pjesë e shoqërisë”, – tha Klosi.
    Ministri Klosi preku edhe një herë nevojën për të ndërhyrë në arsimin profesional, për ta bërë atë më fleksibël ndaj interesave dhe kërkesave të komunitetit të biznesit në përgjithësi dhe të tregut europian të punës në veçanti. Për këtë qëllim, ai paralajmëroi një reformim të këtij sistemi, duke përfshirë këtu bashkimin e Qendrave të Formimit Profesional me shkollat e mesme të Arsimit Profesional për t’i kthyer ato në qendra multifunksionale. “Ne sot kemi një handikap shumë të madh në vendin tonë, pasi nga njëri krah kemi vende të lira pune për profesione të caktuara dhe nga krahu tjetër kemi me qindra e qindra kërkesa për punësim. Për këtë qëllim, ne qendrat duhet t’i orientojmë drejt tregut të punës. Duhet të jemi shumë më tepër aktivë, pasi nuk mund të mbetemi vetëm në kurset e parukiereve, por duhet të orientohemi shumë herë më tepër drejt profesioneve bazë dhe atyre specifike, ku t’i përgatitim individët jo vetëm për tregun shqiptar të punës por edhe për atë europian”, – u shpreh ministri Klosi. Falë bashkëpunimit mes Ministrisë së Mirëqenies Sociale dhe Rinisë dhe Ministrisë së Drejtësisë, kanë përfunduar kurset e formimit profesional deri në fund të muajit gusht 182 të burgosur, ndërkohë që gjatë ditës së sotme u certifikuan 5 grupe kursantësh dhe konkretisht një grup guide turistike, tri grupe sekretarie dhe një grup kujdestarie fëmijësh.