TIRANË – “Nuk do të ketë asnjë rritje të tarifave të studimit për studentët dhe se ato do të jenë të njëjta si ato të një viti më parë”. Kështu u shpreh Ministria e Arsimit, Lindita Nikolla pas përfundimit të mbledhjes së qeverisë, ku foli përsëri rreth rëndësisë dhe asaj çfarë do të sjellë ligji i ri i arsimit të lartë, i cili u miratua në Parlament në orët e para të mëngjesit të sotëm.
Nikolla tha se do të bëhet e mundur sigurimi i arsimit të lartë cilësor dhe do të krijohen mundësi më të mëdha për arsimim për studentët në nevojë.
“Do të sigurojë arsim të lartë më cilësor, mundësi më të mëdha për arsim për studentët në nevojë, nxitje për të rinjtë për të ndjekur studimet në degët prioritare apo në degët e mbrojtura, si dhe zhvillim të cilësisë dhe ekselencës,” – tha Nikolla.
Duke ju përgjigjur edhe pretendimeve të opozitës se ky ligj i ri i arsimit të lartë do të rëndojë mbi xhepat e familiarëve dhe do ta bëjë të pamundur mundësinë për tuarsimuar për të varfrit, Nikolla tha se me këtë ligj studentët që vijnë nga familjet e varfra nuk do të paguajnë asnjë lek. Gjithashtu edhe studentët të cilët kanë meritën dhe ata të ekselencës nuk do të paguajnë pasi për të gjithë këto shteti mundëson bursa.
“E thënë qartë dhe prerë: Asnjë lek nuk do të paguajnë studentë që vijnë nga familjet e varfra; asnjë lek nuk do të paguajnë studentë që kanë meritën dhe do të preferojnë të vijojnë studimet e larta universitare në degët e mbrojtura apo në degët prioritare të zhvillimit të vendit dhe sigurisht, asnjë lek studentët e ekselencës. Për të gjithë këto kategori, ligji mundëson bursa nga shteti”, – tha Nikolla .
