Ndërkohë që vëmendja publike është përqëndruar në një numër të kufizuar kompanish private, të cilat fitojnë “pjesën e luanit” në tendera, ekzistojnë edhe disa të tjera, të cilat, megjithëse më të “heshtura”, sigurojnë miliarda lekë publike, një pjesë prej tyre në procedura pa konkurencë.
“Bami” shpk është një kompani ndërtimi nga Kruja, e cila llogaritet të jetë shpallur fitues në tendera publikë për një vlerë totale rreth 25 milionë euro, sipas të dhënave të gjeneruara në portalit “spendingdata”.
Në disa prej këtyre tenderave, , në rendin e disa miliardave lekë, kompania “Bami” është shpallur fituese në përfundim të procedurave të konsideruara me “flamuj të kuq”.
Për ekspertët e financiave, tenderat me “flamuj të kuq”, pra, me procedura që mund të cënojnë konkurencën, konsiderohen, ndër të tjera, ato tendera ku fituesi është edhe i vetmi i kualifikuar nga autoriteti kontraktor përkatës.
Dhe, në procedura të tilla, “Bami” shpk është shpallur disa herë fitues.
“Bami”, 25 mln lekë tendera në 4 vjet
Kompania “Bami” është krijuar në vitin 1999 dhe ka vendosur thuajse “hegjemoni” në tenderat për ndërtimin e rrugëve dhe punëve të tjera publike në zonën e Krujës dhe Fushë-Krujës.
Megjithëse ka ruajtur një profil të ulët publik, “Bami” rezulton se ka përfituar tendera të konsiderueshëm në Bashkinë e Tiranës, së drejtuar nga Erion Veliaj, si edhe nga Fondi Shqiptar i Zhvillimit e Autoriteti Rrugor Shqiptar
Në bazë të të dhënave të portalit “spendingdata”, kompania “Bami” shpk ka përfituar, në total mbi 25 miliardë lekë të vjetra pa TVSH, shumë e cila përllogaritet në rreth 25 milionë euro.
Gjatë mandatit të Veliajt në Bashkinë e Tiranës, kompania “Bami” shpk është shpallur fitues në disa tendera, me vlerë totale rreth 3.5 milionë euro.
Nga Fondi Shqiptar i Zhvillimit, kompania nga Kruja ka arkëtuar rreth 1.5 milionë euro gjatë 4 viteve të fundit.
Autoriteti Rrugor Shqiptar ka kryer transaksione me “Bami” shpk, për një total prej mbi 7 milionë euro.
Ndërkohë, Bashkia Krujë duket se është institucioni që ka ndihmuar më shumë në forcimin financiar të “Bami” shpk, me shpalljen fitues në tendera, me një total prej rreth 7.5 milionë euro.
Tenderat me flamuj të kuq
– Në Korrik 2019, Ndërmarrja e Ujësjellës-Kanalizime të Bashkisë së Tiranës, strukturë në varësi të Erion Veliaj, shpall kompaninë “Bami” shpk fituese të tenderit për “rikonstruksionin e rrjetit në rrugën ‘Xhanfize Keko”.
Fondi limit për këtë tender ishte 543 milionë lekë të vjetra pa TVSH dhe në procedurë morën pjesë, fillimisht, dy konkurentë-“Bami” shpk dhe “Ina”.
Disa ditë para mbylljes së tenderit, kompania “Ina” i dërgon një shkresë Ujësjellësit të Tiranës, në të cilën njofton tërheqjen nga gara. Në procedurë mbeti vetëm “Bami” shpk, e cila u shpall fituese, në mungesë të konkurencës.
– Në Shtator 2018, Bashkia e Vorës zhvillon tenderin për “Ndërtimin e stacionit të autobusëve, rikonstruksionin e ujërave të zeza dhe riparimin e barrierave suonore”, me fond limit mbi 200 milionë lekë të vjetra, pa TVSH.
Në tender marrin pjesë 3 kompani, përfshirë “Bami” shpk. Në përfundim të procedurave, autoriteti kontraktor skualifikon nga gara dy konkurentët e “Bami”-t, duke e lënë të vetëm në garë dhe, rrjedhimisht, duke e shpallur edhe fitues të procedurës.
– Në Korrik 2018, Bashkia e Tiranës shpall fituese kompaninë “Bami” në tenderin “Rikonstruksion i trotuarëve dhe rrugës “Hoxha Tahsim” dhe “Xhanfize Keko”, me fond limit 1 miliardë lekë të vjetra pa TVSH.
Në tender marrin pjesë 9 operatorë ekonomikë. Në përfundim të procedurave, Bashkia e Tiranës, e drejtuar nga Erion Veliaj, vendos skualifikimin e 8 operatorëve, duke lënë në garë vetëm “Bami” shpk, e cila, natyrisht u shpall fituese, në mungesë të konkurencës.
– Në Korrik 2017, Bashkia e Krujës, nëpërmjet financimit të Fondit për Zhvillimin e Rajoneve, zhvillon tenderin për “Zgjerimin e rrugës kryesore dhe rikualifikimin e sheshit ‘Mustafa Mërlika’.
Fondi limit për këtë tender ishte mbi 1 miliardë lekë të vejtra bashkë me TVSH.
Në procedurë marrin pjesë 7 konkurentë. Autoriteti kontraktor, Bashkia e Krujës, në përfundon të shqyrtimit të dokumentacionit, vendosi skualifikimin e 6 konkurentëve.
Në garë mbeti vetëm “Bami” shpk, e cila u shpall fituese e tenderit.
– Në qershor 2016, Bashkia e Krujës zhvillon tenderin për “Rehabilitimin e skemës ujitëse të rezervuarit Thumanë”, me fond limit 250 milionë lekë të vjetra, pa TVSH.
Në tender marrin pjesë 14 kompani, nga të cilat skualifikohen 12. “Bami” shpk, e cila kishte dhënë ofertën e pestë më të lartë, mbeti e para, pas skualifikimit të 4 të tjera që kishin dhënë ofertë më të ulët.
Rrjedhimisht, ajo u shpall fituese, pasi iu “hap rruga” nga Autoriteti Kontraktor, Bashkia Krujë.
– Në Maj të vitit 2016, Bashkia e Krujës hap tenderin për “Zgjerimin e rrugës hyrëse të qytetit dhe rikualifikimin e qendrës”, në atë që konsiderohej si “Rilindje Urbane”.
Vlera limit e parashikuar për këtë tender ishte mbi 3 miliardë lekë pa TVSH dhe financimi u krye nga Fondi për Zhvillimin e Rajoneve.
Në tender morën pjesë 6 operatorë ekonomikë, ndër të cilët edhe bashkimi i kompanive “Bami” shpk dhe “ANK”.
Në përfundim të procedurave, “Bami” & ‘ANK” shpallen fitues të tenderit, pasi më parë Bashkia e Krujës kishte skualifikuar të gjithë konkurentët e tjerë./BoldNews.al
