Agjencia e Kadastës publikon 13 dokumentet tekniko-ligjore që banorët duhet të plotësojnë për banesat e tyre, dyqanet, garazhdet etj, të cilat kanë mbetur të pa hipotekuara për shkak të detyrimeve që kanë pasur ndërtuesit e objekteve. Kërkesat do të plotësohen nga individët dhe do të depozitohen nga administratori i pallatit, apo objekteve të tjera kolektive. Ja lista e plotë e dokumenteve për regjistrim
Individët në pronësi të apartamenteve të paregjistruara në hipotekë, për shkak të mosndjekjes të procedurave nga ndërtuesit duhet të plotësojnë dokumentacionin tekniko-ligjor për mbylljen e procesit. Agjencia Shtetërore e Kadastrës njofton se për zgjidhjen e ngërçit të krijuar ndër vite, banorët nuk mund të paraqesin kërkesat për regjistrim në mënyrë individuale, por nëpërmjet personit të zgjedhur, i cili do të luajë rolin e administratorit të procesit. Legalizimi i apartamenteve të braktisura nga investitori, nuk mund të nisë nga ana e Agjencisë Shtetërore të Kadastrës (ASHK), nëse nuk është dorëzuar mbi 80% e dokumentacionit të gjithë godinës. Agjencia e kadastrës sqaron se personi i autorizuar, duhet të hartojë listën e saktë të banorëve posedues dhe pronarë legjitimë të apartamenteve, njësive apo garazheve, ndarë sipas kateve, renditur sipas radhës, si dhe numrin rendor fizik të pronës që posedojnë. Në dy vitet e fundit ka përfunduar regjistrimi në hipotekë për 160 objekte.
Lista e dokumenteve për regjistrim
1.Përcaktimi i personit –administratorit të procesi
Përfaqësuesi i zgjedhur nga banorët duhet të jetë i autorizuar me prokurë. Si i tillë mund të caktohet administratori i pallatit, avokat, individ i besuar nga qytetarët, etj. Ai do te luajë rolin e administratorit të procesit, do të mbajë kontaktin me institucionin/institucionet si dhe banorët, paralelisht, për të koordinuar bashkëpunimin, mbledhjen e dokumentacionit të nevojshëm, për të përfaqësuar qytetarët në takime sipas nevojës, etj.
2.Lista e banorëve
Personi i autorizuar, duhet të hartojë listën e saktë të banorëve posedues dhe pronarë legjitimë të apartamenteve, njësive apo garazheve, ndarë sipas kateve, renditur sipas radhës, si dhe numrin rendor fizik të pronës që posedojnë.
3.Kopje të vetëdeklarimeve/kontratave
Personi i autorizuar, duhet të mbledhë nga qytetarët që ai përfaqëson, të gjitha vetëdeklarimet, kontratat e porosisë së banorëve, si dhe çdo akt tjetër noterial që lidhet me pronën e poseduar. Që të fillojë procedura e legalizimit nga ana e ASHK, duhet që minimalisht të jenë mbledhur mbi 80% e dokumentacionit të të gjithë godinës.
4.Kopje të ID
Personi i autorizuar, duhet të mbledhë kopje të kartave të identitetit të personit/personave që kane kryer blerjen, d.m.th që kanë firmosur kontratën e porosisë, në momentin e blerjes.
5.Çertificatë familjare të blerësit, në momentin e blerjes
Personi i autorizuar, duhet të mbledhë të gjithë certifikatat familjare të personit/personave që kane kryer blerjen, d.m.th që kanë firmosur kontratën e porosisë, në momentin e blerjes.
6.Kalimet mbi pronësinë, njësinë e poseduar
Personi i autorizuar, duhet të mbledhë dhe të administrojë në dokumentacionin e dorëzuar, kontratat të cilat kanë realizuar shitje në palë të treta. Pra, të sigurohet përfituesi final juridikisht i vlefshëm, i njësisë, apartamentit apo garazhit.
7.Projekti i miratuar
Personi i autorizuar, duhet të dorëzojë në format dixhital (ne DËG), projektin e përpunuar sipas lejes së miratuar në njësinë vendore përkatëse. Kopja e projektit mund të tërhiqet nga bashkia/komuna, për ta përpunuar nga format letre në format dixhital.
8.Projekti i gjendjes ekzistuese
Personi i autorizuar, duhet të dorëzojë në format dixhital (në DËG), projektin e përpunuar sipas gjendjes ekzistuese sot. Në këtë dokument, do të paraqiten të gjitha ndryshimet e mundshme, që ka pësuar objekti nga leja e miratuar, duke reflektuar sipërfaqet e shtuara, sipërfaqet e mbyllura, ndryshimet e destinacionit.
9.Projekti i pallatit pa leje ndërtimi
Personi i autorizuar, duhet të dorëzoje në format dixhital (ne DËG), projektin e pallatit të ndërtuar pa leje.
10.Tabela e sipërfaqeve Personi i autorizuar, duhet të konfirmojë se, së bashku me projektin e zbatuar, të jetë dorëzuar edhe tabela e sipërfaqeve në çdo kuotë, me ndryshimet që janë realizuar nga projekti i miratuar me leje ndërtimi.
11.Akt-ekspertiza e qëndrueshmërisë së objektit. Personi i autorizuar, duhet të dorëzoje akt ekspertizën për qëndrueshmërinë e objektit, të hartuar dhe firmosur nga inxhinier konstruktor i licensuar. Së bashku me akt-ekspertizën, duhet të jenë të bashkëlidhura licensa e vlefshme juridikisht, e noteruar, (studio apo individ, qoftë). Akti realizohet një i vetëm për të gjithë godinën, pavarësisht se sa prej banorëve kanë paguar apo jo për realizimin e aktit. Nëse do të disponohet, dokument i vlefshëm juridikisht, konsiderohet edhe deklarata noteriale e konstruktorit, zbatuesit të punimeve dhe investitorit, ku sigurohet se objekti i zbatuar është konstruktivisht i qëndrueshëm edhe pas ndryshimeve në zbatim.
12.Akt marrëveshje midis ndërtuesit dhe pronarëve të truallit. Personi i autorizuar, duhet të saktësojë dhe sigurojë nëse, përfitues në leje legalizimi brenda godinës, janë edhe pronarët e truallit, apo trashëgimtare të tyre. Nëse në dokumentacionin poseduar nga ASHK, kontrata e sipërmarrjes është në mungesë, pronarët e truallit duhet të dorëzojnë kopje të akt-marrëveshjes ose kontratës së sipërmarrjes, si dhe çfarëdo akti tjetër notarial, i cili ka lidhje me këtë zhvillim.
13.Akte noteriale
Çfarëdo akti notarial, që lidhet me posedimin dhe pronësinë, është mirë të depozitohet si dokumentacion shtesë, për të qartësuar gjendjen juridike.