Sot afati i fundit – Vettingu i drejtësisë, 180 aplikantë për strukturat e rivlerësimit

531
180 persona kanë shprehur interes për të qenë anëtarë të strukturave të cilat do të bëjnë rivlerësimin e afër 800 gjyqtarëve dhe prokurorëve të vendit.
Të paktën ky është numri i regjistruar deri në orën 20.30 të mbrëmjes së të enjtes, e cila shënon mbylljen e afatit të aplikimeve direkte, ndërkohë që për aplikimet online afati është deri në mesnatë, ndërsa për ato me postë, deri të premten. Mjaft që dokumentet të jenë nisur brenda datës 9 shkurt.
Burime pranë zyrës së Avokatit të Popullit bëjnë të ditur se mes aplikantëve ka dhe mjaft jurist që jetojnë dhe ushtrojnë aktivitetin e tyre jashtë Shqipërisë.
Numri i të interesuarve shënoi një rritje të ndjeshme pasi fundjavën e shkuar ambasada e Shteteve të Bashkuara në Tiranë si dhe Delegacioni i Bashkimit europian, bënë thirrje publike për profesionistët shqiptarë që të aplikonin, për institucionet që do të kenë përgjegjësinë për të kryer procesin ndoshta më të rëndësishëm të të gjithë Reformës në Drejtësi.
Brenda 7 ditëve Avokati i Popullit, në konsultim me misionin ndërkombëtar, i cili ka qasje në të gjithë dokumentacionin, harton dy lista me ata që plotësojnë ose jo formalisht kriteret.
Më pas do të jetë misioni ndërkombëtar që do të bëjë vlerësimin për cdo kandidaturë, duke hartuar dhe rekomandimet që përmes Avokatit të Popullit i kalojnë parlamentit.
Në këtë fazë do të jenë të angazhuar dy ekspertë amerikanë dhe tre europianë.
Sigal