“Blater është një person për t’u admiruar, ka bërë shumë për futbollin dhe meriton çmimin Nobel për paqen për punën që ka bërë: kontributi i tij në sferën humanitare ka qenë kolosal”. Kështu e ka vlerësuar presidenti rus, Vladimir Putin, presidentin e pezulluar të FIFA-s, Sep Blater, në konferencën për shtyp të fundvitit.
Mediat ndërkombëtare shkruajnë se Putin njihet si një mbështetës i zviceranit edhe në kohën kur ai ishte në qendër të akuzave për korrupsion në FIFA, paçka se presidenti rus ka dënuar rastet e korrupsionit në futboll, shkruajnë mediat.
Deklaratat e Putinit vijnë një ditë para se të merret vendimi nga gjykata për një aferë korruptive mes Blaterit dhe Platinisë (president i pezulluar i UEFA-s).
Të dy janë në pritje të vendimit për shpërblimin e 2 milionë dollarëve që Platini mori në vitin 2011 për punën e tij në FIFA midis 1998 dhe 2002.
