Vila e Artë e Rashidit, pro-amerikanit afgan dhe Sarajet e Surrelit të “pro-amerikanit” Rama

170
Sigal

Talibanët arritën një fitore të rëndësishme në planin e propagandës, kur mësynë në vilën luksoze të Abdul Rashid Dostum, një prej drejtuesve më të lartë të ushtrisë dhe politikës së Afganistanit.

Pamjet e dhomave të mbuluara me flori, mobilje të lara e shpëlara me ar dhe kristalinat e shpërndara në të gjithë shtëpinë, u shërbejnë talibanëve “të egër”, për t’u sjellë si revolucionarë e për të dëshmuar se po luftojnë “për popullin” e varfër.

Rashid Dostum u arratis nga Afganistani gjatë orëve të fundit. Ai ka qenë një prej figurave kyçe të shtetit afgan, pas luftës së nisur në atë vend në vitin 2001.

Dostum, një feudal i fuqishëm, njihej si një prej aleatëve më të rëndësishëm të Shteteve të Bashkuara të Amerikës në zonë.

Ai mbështeti trupat amerikane për të rrëzuar regjimin Taliban 20 vjet më parë dhe për të instaluar qeveritë, të cilat, siç u tha, do të sillnin ndryshimin në vendin aziatik.

Në këmbim, Abdul Rashid Dostum nuk u kursye aspak në fuqizimin e pushtetit dhe luksit të tij.

Natyrisht, këtë jetë luksoze duhet ta dinin edhe aleatët e tij amerikanë, të cilët luftuan në Afganistan për plot 2 dekada, me qëllimin e deklaruar, atë të vendosjes së demokracisë në atë vend të ashpër.

Dhe, natyrisht, amerikanëve u duheshin aleatë të fuqishëm vendas, duke mbyllur sytë për jetën dhe bëmat e tyre “lokale”.

Rëndësi kishte që Dostumi afgan të qëndronte në krah të tyre, pavarësisht se aktiviteti i tij politik dhe ushtarak, siç citohet në mediat britanike e amerikane, ishte një ndër shkaqet që talibanët fuqizuan pozitat e tyre në popullatën afgane.

Tashmë, “pro-amerikani” më i madh afgan u largua në errësirë, duke lënë pas luksin e jetës së tij në duar kaçakësh. Tanimë, as aleatët e tij nuk mund ta mbështesin.

I vetmi favor që mund t’i bëjnë është që t’i gjejnë një strehë të re, mundësisht edhe në Shqipëri.

E, nëse vjen në Shqipëri, do të shohë një si-vëllain e tij, i cili është kryeministër prej tre mandatesh-Edi Ramën.

Pinjoll i një ish-komunisti të rangut të lartë, Edi Rama tashmë ka veshur petkun e “pro-amerikanit” më të flaktë.

Ai është në “Yes-man” i çdo të dërguari të Uashingtonit, mjafton që këta të fundit të mos e shqetësojnë në fuqizimin e pushtetit dhe pasurisë së tij.

Dostumi afgan kishte vilë floriri. Ndërsa Rama shqiptar ka saraje në Surrel.

Asnjë nuk ka arritur të tregojë se çfarë ka brenda këtyre sarajeve. Por mjafton të shihen nga jashtë, për të kuptuar se kanë kushtuar “një djall e gjysëm”.

Burimi? Shitja e pikturave, rroga si kryeministër. Jo? Të ardhurat si emigrant dhe rroga si kryeministër? Jo, të ardhura nga pikturat dhe paja e bashkëshortes?

Janë të paktën tre versione që ka thënë publikisht kryeministri shqiptar për financimin e sarajeve të Surrelit.

As ai vetë nuk e di se si i ka ndërtuar. Por, megjithatë, ai është i paprekshëm përkohësisht. Ai është “aleat” i SHBA-së, ashtu si Rashid Dostumi i Afganistanit.

Edhe Edi Rama, ashtu si Dostumi aziatik, bashkëpunon me aleatët për të “demokratizuar” këtë vend, në cep të Ballkanit.

E, në këmbim të lodhjes për këtë “qerrata popull”, Rama i meriton sarajet.