Autoritetet spanjolle planifikojnë të dërgojnë katër deri në gjashtë tanke të rinovuar, Leopard 2A4, në Ukrainë në dërgesën e tyre të parë drejt Kievit, raportoi gazeta El Pais të ditën e sotme.
Sipas tyre, numri përfundimtar do të varet nga gjendja e 53 tankeve që janë ruajtur në Zaragoza për dhjetë vjet, ndërsa ministria spanjolle e Mbrojtjes është aktualisht në bisedime për restaurimin e tyre sa më të shpejtë.
Gazeta shkruan gjithashtu se rinovimi i një tanku Leopard mund të kushtojë mbi gjysmë milioni euro dhe se kohëzgjatja e parashikuar e restaurimit është dy muaj e gjysmë, e cila është e barabartë me kohëzgjatjen e kursit të trajnimit që ushtria e vendit ka zhvilluar për ekuipazhet e tankeve ukrainase.
Ministria e Mbrojtjes e Spanjës mund t’i sigurojë Kievit gjithashtu një grup pjesësh rezervë për tanket Leopard, ndërsa dërgimi i municioneve 120 mm është një çështje më e vështirë sepse Spanja nuk prodhon municione të tilla dhe do të duhej të përdorte rezervat e ushtrisë.
