Diplomati i lartë i Amerikës Mike Pompeo është karantinuar të Mërkurën pasi u ekspozua ndaj një personi që ka rezultuar pozitiv për Covid-19, transmetoi Departamenti i Shtetit.
Sekretari 56-vjeçar i Shtetit “është testuar dhe është negativ,” u deklarua.
“Në përputhje me udhëzimet e CDC, ai do të jetë në karantinë,” tha Departamenti i Shtetit. “Ai po monitorohet nga afër nga ekipi mjekësor i Departamentit.”
Departamenti i Shtetit tha se për arsye të privatësisë nuk po identifikonte personin me të cilin Pompeo ra në kontakt.
Sekretari i Shtetit i SH.B.A.-së është i katërti pas presidentit, nënkryetarit, kryetarit të Dhomës së Përfaqësuesve dhe presidentit pro tempore të Senatit.
Presidenti Donald Trump u shtrua në spital për tre ditë në tetor pasi u infektua me Covid-19. Gruaja e tij, Melania dhe djali Barron, gjithashtu u prekën nga sëmundja.
Ndërsa Trump shfaqej shpesh në publik pa ndonjë maskë, Pompeo zakonisht vishte një të tillë gjatë udhëtimeve të tij të huaja.
Pompeo dhe gruaja e tij, Susan, organizuan një festë pushimi të martën për familjet e diplomatëve amerikanë që shërbejnë jashtë shtetit.
Sipas Washington Post, Pompeo ishte planifikuar të fliste në ngjarje por anuloi fjalimin e tij.
Gazeta tha se më shumë se 900 ftesa ishin dërguar për pritje, por më pak se 70 njerëz u paraqitën për ngjarjen e brendshme.
Autoritetet shëndetësore të SH.B.A.-së kanë dekurajuar tubimet e mëdha brenda shtëpisë mes pandemisë së koronavirusit që ka lënë më shumë se 300,000 njerëz të vdekur në Shtetet e Bashkuara.
Rrjeti televiziv CNN raportoi ndërkohë që Pompeo kishte planifikuar të takohej diku në ditët e ardhshme me Antony Blinken, i cili është emëruar nga Presidenti i zgjedhur Joe Biden për të qenë sekretari tjetër i shtetit.
Pompeo është një nga mbështetësit më besnikë të Trump dhe një takim me Blinken shihet si potencialisht problematik për sekretarin e shtetit pasi presidenti ende nuk ka pranuar humbjen e zgjedhjeve të 3 nëntorit.
