Elon Musk i tha stafit të Twitter të enjten që të përgatitej për “kohë të vështira përpara” dhe paralajmëroi se kompania mund të falimentojë nëse nuk gjen mënyra të reja për të fituar para.
Duke folur në një takim përpara punonjësve të kompanisë, Musk tha se Twitter po humbiste para dhe se “falimentimi i mundshëm nuk mund të përjashtohet”. Deklaratat e Musk vijnë pas një zhvillimi tjetër të mërkurën, ku ai urdhëroi të gjithë punonjësit e Twitter të ndalonin së punuari nga shtëpia dhe të paraqiteshin në zyrë të enjten në mëngjes, duke përmbysur politikën e “punës nga kudo” që Twitter zbatoi gjatë pandemisë.
“Më falni që ky është emaili im i parë për të gjithë kompaninë, por nuk ka asnjë mënyrë për ta përmbledhur mesazhin”, shkroi Musk, përpara se të përshkruante një klimë të tmerrshme ekonomike për Tëitterin.
“Pa të ardhura të konsiderueshme nga abonimet, Twitter nuk do t’i mbijetojë rënies së ardhshme ekonomike,” tha Musk në email. “Ne kemi nevojë për afërsisht gjysmën e të ardhurave tona për të qenë me abonim”, shtoi ai.
