Në përpjekje për të lehtësuar disa masa të izolimit nga koronavirusi, Danimarka nis sot rihapjen e çerdheve dhe të shkollave fillore, raporton BBC.
Sipas të dhënave nga ky vend, me rregullat e reja, fëmijët do të mbahen më larg njëri-tjetrit se zakonisht, do të ketë regjime të rrepta.
Kufizimet e tjera, si ndalimi i tubimeve në masë, mbeten, por autoritetet qeveritare thanë se numri i njerëzve të shtrirë në spital, si pasojë e koronavirusit, është në rënie dhe se kufizimet e tjera mund të hiqen së shpejti.
Deri me tani Danimarka ka mbi 6,700 të infektuar me koronavirus dhe rreth 300 viktima.
Këtë javë, masat e izolimit kanë nisur t’i lehtësojnë edhe disa shtete të tjera evropiane, përfshirë: Italinë, Austrinë dhe Spanjën.
Përkundër kësaj tentativë për lehtësim masash, presidenti i Francës, Emmanuel Macron, e ka zgjatur izolimin atje deri më 11 maj, ndërkohë që Britania deri më 7 maj.
