Disa fjalë të improvizuara e bënë të futej në histori. Gunter Schabowski, zyrtari gjermano-lindor, i cili përshpejtoi rrëzimin e murit të Berlinit më 9 nëntor 1989, vdiq sot në moshën 86-vjeçare. “Ish-gazetar, më pas zëdhënës i komitetit qendror të SED, partia komuniste që drejtonte Gjermaninë Lindore, vdiq në kryeqytetin e ribashkuar të vendit”, njoftoi bashkëshortja e tij për agjencinë e lajmeve DPA. Vdekja e tij ndodhi disa ditë para 26-vjetorit të hapjes në konfuzion dhe eufori, të kufirit që ndau Berlinin për 28 vjet dhe shënoi epiqendrën e Luftës së Ftohtë.
“Nuk do ta cilësoja veten si heroi që hapi kufirin, kam vepruar në përpjekje për të shpëtuar sistemin e Republikës Demokratike të Gjermanisë”, ishte shprehur Schabowski në vitin 2009, duke kujtuar minutat që sollën ndryshimin e Gjermanisë. Më 9 nëntor 1989, pas disa muajve manifestimesh masive, sekretari i përgjithshëm i SED-it (Partia Socialiste e Bashkuar) Egon Krenz informoi drejtuesit kryesorë të regjimit se një legjislacion i ri për udhëtimet jashtë vendit do të miratohej. Gunter Schabowski, i cili publikoi për median ndërkombëtare listën e vendimeve të fundit të regjimit, priti përfundin e konferencës së tij për shtyp, për të njoftuar hapjen e kufijve duke shpresuar për të shmangur pyetjet.
