Europa mbylli të dielën votimet për Parlamentin Europian, duke shënuar pjesëmarrjen më të lartë në 20 vite. Rekordin e mban Danimarka ku dolën në votime 63 përqind, ndërkohë që mendohet se mesatarja në BE të shkojë tek 51 përqind.
Megjithatë, panorama në BE mbetet ndjeshëm e fragmentarizuar. Në Gjermani, të djathtët e CDU/CSU mbeten partia e parë, por Të Blertët kanë shënuar surprizën më të madhe.
Në Francë, të djathtët e Marine Le Pen thuhet se ia kanë dalë t’i japin një goditje presidentit centrist, Emmanuel Macron. Të dhënat e para sugjerojnë se partia e Le Pen ka marrë 23.2 përqind të votave, përkundrejt 21.9 përqind të Macron. Kjo do ishte një goditje e fortë për presidentin francez, që e ka cilësuar veten një kampion për Europën.
Edhe të dhënat nga Greqia tregojnë se gjërat po shkojnë mirë për të djathtën. Partia Demokracia e Re udhëheq me mbi 8.5 pikë diferencë ndaj partisë në pushtet, Syriza.
Mendohet se Demokracia e Re do të fitojë nga 32.5 deri në 34.5 përqind të votave. Kurse Syriza mund të shkojë nga 24 deri në 26 përqind.
