Dr. Mark Ellis, drejtor ekzekutiv i Shoqatës Ndërkombëtare të Avokatëve, me seli në Londër dhe ekspert i së drejtës penale ndërkombëtare, ka folur për mundësinë e arrestimeve të reja të ish-pjesëtarëve të Ushtrisë Çlirimtare të Kosovës nga Gjykata Speciale.
Në një intervistë Ellis ka thënë se Specialja ka hetuar në heshtje për vite me radhë se nuk ishte praktikë e saj që t’i bënte publikë detajet në lidhje me aktakuzat e mundshme.
“Praktika e KSC & SPO nuk ka qenë zbulimi publik i detajeve në lidhje me aktakuzat e mundshme ose aktuale. Gjykata ka hetuar në heshtje për vite me radhë, me punën e saj duke u theksuar me njoftimin e fundit të padive dhe fillimin e gjykimeve paraprake”, ka thënë eksperti i së drejtës penale ndërkombëtare.
Ai ka thënë se mund të ndodhë që të ketë aktakuza të reja nga Gjykata Speciale në të ardhmen.
“Kohët e fundit SPO njoftoi se po “kryente operacione të vazhdueshme në Kosovë”. Kështu, ka shumë të ngjarë që të ketë aktakuza shtesë që do të shpallen në të ardhmen”, është shprehur drejtori ekzekutiv i Shoqatës Ndërkombëtare të Avokatëve për “Bota sot”.
Ellis në intervistë, nuk e ka përjashtuar mundësinë që ish-presidenti Hashim Thaçi të dënohet me burgim të përjetshëm. Por, kjo megjithatë, sipas tij, nuk do të ndodhë.
“Është e rëndësishme të kujtohet se KSK funksionon brenda sistemit juridik të Kosovës, i cili shikon Kodin Penal të Kosovës për të përcaktuar kohëzgjatjen e dënimeve. Sipas Kodit Penal të Kosovës, dënimi për krime lufte dhe krime kundër njerëzimit dhe gjenocid, varion nga një burgim prej minimum 15 vjet në një maksimum me burgim të përjetshëm. Kështu, duke marrë parasysh akuzat kundër z. Thaçi, dënimi me burgim të përjetshëm është i mundur, por për mendimin tim, jo i mundshëm”, ka deklaruar për gazetën Mark Ellis, drejtor ekzekutiv i Shoqatës Ndërkombëtare të Avokatëve.
Thaçi dhe ish-krerët e Ushtrisë Çlirimtare të Kosovës, Kadri Veseli, Jakup Krasniqi dhe Rexhep Selimi, po mbahen në paraburgim në Gjykatën Speciale, për krime lufte dhe krime kundër njerëzimit.
