‘1.5 milionë euro kokainë në furgon’/ Qeni merr në qafë shqiptarin në Itali

108
Sigal

Një shqiptar është arrestuar sot nga policia italiane pasi po transportonte mbi 6 kg kokainë, të fshehur shumë mirë në furgonin e tij.

Sipas raportimeve të mediave, ai e përdorte punën e tij si korrier për fshehur trafikun e kokainës. Ai u arrestua në dalje të autostradës Sarzana. Policët ndaluan furgonin me targa spanjolle dhe vendosën të bënin një kontroll rutinë.

Shqiptari shfaqi menjëherë një gjendje ankthi të dukshme, ndaj patrulla vendosi ta thellonte kontrollin me ndihmën e njësisë së qenve, të cilët, pasi hipën në furgon, filluan menjëherë të raportojnë me këmbëngulje brendësinë e dyshemesë.

Kokaina ishte e ndarë në 19 pako, ndërsa vlera e saj në treg llogaritej deri në 1.5 mln euro.

Gjithsej në 19 pakot kishte 6.150 kg kokainë të pastër, e cila u sekuestrua së bashku me furgonin e përdorur për transport.

Shqiptari i cili rezultonte me precedentë të mëparshëm penalë, u shoqërua në burgun e Masës.