Dita e enjte ka shënuar mbylljen e aplikimeve për postin e Prokurorit të Përgjithshëm. Në garë janë zyrtarisht katër kandidatë: Arta Marku, Olsian Çela, Lulzim Alushaj dhe Fatjona Memmcaj.
Tanimë pritet që 11 anëtarët e KLP-së të bëjnë renditjen në bazë të Kushtetutës dhe kritereve te vendosura nga vetë KLP. Kryeprokurorja e Përkohshme Arta Marku ishte kandidatja e katërt që hyri në garën për të drejtuar Prokurorinë e Përgjithshme, pas Olsian Çelës, Fatjona Memçajt dhe Lulzim Alushajt. Marku edhe nëse nuk rikonfirmohet si Kryeprokurore, kalon automatikisht gjyqtare në Gjykatën e Apelit siç e përcakton edhe statusi i Prokurorit të Përgjithshëm.
Prokurori në Prokurorinë e Krimeve të Rënda, Olsian Çela ishte i pari që shpalli kandidaturën për postin e Prokurorit të Përgjithshëm. Ai e ka regjistruar kandidaturën e tij më 19 prill në KLP.
Fatjona Memçaj, ka kaluar me sukses procesin e Vettingut dhe ka rezultuar në rregull me deklarimet e pasurisë.KLP-ja e ka hapur garën për Kryeprokuror më 19 mars dhe do i dërgojë për miratim Kuvendit tre kandidatura të renditura sipas vlerësimit që kanë marrë. Prokurori i Përgjithshëm do zgjidhet me tre të pestat e votave. Nëse parlamenti dështon në zgjedhjen e njërit prej tre kandidatëve, brenda 30 ditëve nga marrja e propozimeve, atëherë emërohet automatikisht ai që është i renditur i pari në listë.
