TIRANE – Vendimi i pafajësisë që pesë gjyqtarët kryesuar nga Dritan Hallunaj, dhanë për biznesmenin Arben Frroku të dyshuar për vrasjen e kryekomisarit Dritan Lamaj, do të inspektohet nga Këshilli i Lartë i Drejtësisë.
Kjo konfirmohet nga Prokuroria e Përgjithshme e cila pak ditë më parë depozitoi në KLD një ankesë për vendimin e gjyqtarëve të cilët më 3 prill e shpallën Frrokun të pafajshëm.
Sipas Prokurorisë së Përgjithshme, Këshilli i Lartë i Drejtësisë nëpërmjet Inspektoriatit i ka kthyer përgjigje organit të akuzës, se “nga analiza e pretendimeve të parashtruara ka konkluduar se ka vend për verifikimin e ankesës” për vendimin e Gjykatës së Krimeve të Rënda në rastin e Arben Frrokut.
Duke rrëzuar provat e Prokurorisë pas më shumë se një viti proces gjykimi gjyqtarët Fran Prendi, Klodian Kurushi, Ardit Mustafa, Liljana Baku dhe Dritan Hallunaj firmosën pafajësinë e biznesmenit per vrasjen e Lamajt ne shkurt te 2013-es.
Pas pafajësisë Prokuroria apeloi vendimin, ndërsa ende Gjykata e Apelit pranë Krimeve të Rënda nuk ka marrë në shqyrtim këtë kërkesë ku pritet të vendoset nëse do të mbetet në fuqi pafajësia apo do të ketë një prishje vendimit.
