Vrasja e 60-vjeçarit në Peshkopi, “arrest me burg” për tre bashkëautorët

102
Sigal

Është zbardhur ngjarja e ndodhur në qershor të vitit të kaluar në Peshkopi, ku mbeti i plagosur rëndë 60-vjeçari Nuri Basha, i cili më pas humbi jetën në spital.

Si pasojë e kësaj ngjarjeje është ekzekutuar masa “Arrest me burg”  për veprën penale “Vrasja me dashje” kryer në bashkëpunim për tre shtetas të cilët ishin nën hetim, për këtë ngjarje, për veprën penale “Moskallëzimi i krimit”.

Të arrestuar janë shtetasit, E. T., A. T., dhe L. K., të tre banues në Peshkopi.

Njoftimi i policisë:

VP Dibër/Finalizohet operacioni policor proaktiv i koduar “Deepened”.

Zbardhet ngjarja e ndodhur në qershor të vitit 2022, në Peshkopi, ku mbeti i plagosur rëndë 60-vjeçari N. B., i cili më pas humbi jetën, në spital.

Zbardhja e ngjarjes, si rezultat i hetimeve të thelluara, të zhvilluara nga strukturat hetimore të Drejtorisë Vendore të Policisë Dibër, nën drejtimin e Prokurorisë pranë Gjykatës së Rrethit Gjyqësor Dibër.

Ekzekutohen masat e sigurisë “Arrest në burg”, për veprën penale “Vrasja me dashje”, kryer në bashkëpunim, për 3 shtetas të cilët ishin nën hetim, për këtë ngjarje, për veprën penale “Moskallëzimi i krimit”.

Specialistët e Seksionit për Hetimin e Krimeve kundër Personit, të Drejtorisë Vendore të Policisë Dibër, nën drejtimin e Prokurorisë pranë Gjykatës së Rrethit Gjyqësor Dibër, si rezultat i një pune hetimore të pandërprerë, në vijim të hetimeve të thelluara për zbardhjen dhe dokumentimin me prova ligjore të një ngjarjeje të ndodhur në qershor të vitit 2022, në fushën e krimeve kundër personit, finalizuan me sukses operacionin policor të koduar “Deepened”, si rezultat i të cilit u bë ekzekutimi i masave të sigurisë “Arrest në burg”, për shtetasit:

E. T., 49 vjeç, A. T., 64 vjeç dhe L. K., 53 vjeç, të tre banues në Peshkopi.

Nga tërësia e hetimeve të thelluara dyshohet se më datë 26.06.2022, në lagjen “Kamen”, Peshkopi, pranë lokalit të shtetasit L. K., pas një konflikti për motive të dobëta, shtetasi  E. T., në bashkëpunim me shtetasit A. T.,  L. K. dhe O. T. (i arrestuar më parë), kanë plagosur rëndë 60-vjeçarin N. B., i cili si pasojë e dëmtimeve të marra humbi jetën në spital, dy ditë pas ngjarjes.

Prokuroria pranë Gjykatës së Shkallës së Parë Dibër ka urdhëruar ekzekutimin e vendimit penal të Gjykatës së Shkallës së Parë Dibër, e cila ka caktuar për secilin nga këta shtetas, masën e sigurisë “Arrest në burg”, për veprën penale “Vrasja me dashje”, kryer në bashkëpunim.

Materialet procedurale i kaluan Prokurorisë, për veprime të mëtejshme.

Ngjarja:

Më 26 qershor 2022, fillimisht u raportua se Nuri Basha, duke zbritur nga automjeti i parkuar i shtetasit E.T, ishte rrëzuar aksidentalisht dhe për pasojë u dëmtua në kokë dhe për shkak të plagëve të marra humbi jetën në spital.

Katër ditë pas vrasjes policia bëri me dije se pas hetimeve të kryera, Nuri Basha i cili u raportua se humbi jetë aksidentalisht është vrarë nga 53-vjeçari Osman Torba.

Torba u arrestua nga policia, ndërsa u proceduan në gjendje të lirë 3 shtetasit të cilët sot u arrestuan për “Moskallëzim krimi”.