Vjedhja e naftës përmes tubave të fshehtë, policia arreston 4 punonjës të Alpetrol

158
Sigal

4 persona janë arrestuar nga policia e Fierit, si të dyshuar për vjedhjen e naftës nga shoqëria Alpetrol. Burime bëjnë me dije se personat e arrestuar janë Arjan Kallashi, Selami Rustemi, Dilaver Idrizaj dhe Dashamir Merkaj, të gjithë punonjës të shoqërisë.

“Vihen në pranga 4 punonjës të kompanisë “Alpetrol” për shpërdorim detyre. Specialistët për Hetimin e Krimit Ekonomik e Financiar në DVP Fier, arrestuan në flagrancë shtetasit: A. K., 49 vjeç, banues në Fier, me detyrë kryetar i degës teknike Alpetrol. S. R., 54 vjeç, banues në Fier, pergjegjës për mbarëvajtjen e seperatorëve dhe pompimit. D. I., 56 vjeç, banues në Fier dhe D. M., 54 vjeç, banues në Ballsh, punonjës të task forcës në Alpetrol.

Arrestimi i këtyre shtetasve u bë pas kallëzimit të bërë nga shtetasi Y. S., me detyrë Drejtor i Kabinetit të Alpetrol, se këta shtetas në datë 07.12.2021 kanë vepruar në kundërshtim me urdhërin e brendshëm të Drejtorit të kompanisë Alpetrol, duke transportuar një sasi të konsiderueshme me naftë dhe ujë teknologjik të marrë në depozitat e Usojës, e cila do të injektohej në puset e Kashit.

Materialet do i kalojnë për veprime të mëtejshme Prokurorisë pranë Gjykatës së Shkallës së Parë Fier për veprën penale “Shpërdorimi i detyrës””, njofton Policia e Fierit.