Nuk ka kthim pas për pedagogët. Është çështje orësh që ata të futen në grevë urie.
Në pritje të një sinjali nga presidenti i republikës dhe faktori ndërkombëtar, sindikata e punonjësve të universiteteve të Shqipërisë është në nivel diskutimesh për opsionet që mund t’i ndihmojnë për të arritur kërkesat e tyre. Sot, ata do të dalin me një vendim mbi vijimësinë e protestës në kushtet e një mungese përgjigje nga kreu i shtetit mbi grevën e urisë.
Pas gati tri javësh, bojkot të pjesshëm duhet thënë se ditën e djeshme ka pasur disa lëvizje për t’iu rikthyer normalitet. Dhe këtë e tregoi i pari, Fakulteti i Shkencave të Natyrës, “sythi” prej nga lindi Lëvizja Universitare, e cila u zgjerua me protesta kombëtare përpara Politeknikut.
Nga 90% bojkot të auditorëve dhe vetëm 10% mësim, ditën e djeshme raporti ishte thuajse i përmbysur. Edhe në Fakultetin e Historisë dhe të Filologjisë, Gjuhëve të Huaja dhe Ekonomikut numri i sallave bosh ishte shumë i vogël.
Fakultetet e inxhinierive dhe Bujqësorit gjithashtu kanë parë dje më shumë studentë nga 17 tetori, ditën kur nisi mësimi.
Në kushtet kur bojkoti nuk mund të vijojë pafundësisht, Sindikata po shqyrton opsionin e bojkotit një herë në javë, duke u zhvendosur nga sheshi “Nënë Tereza” te Parlamenti. Fakulteti i Shkencave të Natyrës do të operojë me planin fillestar, bojkot të përditshëm 10:00 me 12:00 në oborrin e fakultetit.
Tre javë bojkot
Sido që të shkojë rrjedha e qëndresës së pedagogëve, ky vit akademik nuk ka nisur mirë. Një pjesë e nxënësve nuk kanë nisur farë mësimin në disa lëndë, ndërsa të tjerë kanë përparuar.
Gjatë kësaj kohe, në deklaratat e përditshme, stafi pedagogjik është shprehur se do të plotësojë të gjithë programin mësimor dhe se studentët nuk rrezikojnë semestrin. Më të prapambetur janë studentët e Bujqësorit, Politeknikut, në disa fakultete në Universitetin e Tiranës, si dhe në rrethe.
Nga ana tjetër, mësim i rregullt është zhvilluar në Universitetin e Mjekësisë, Arteve e Sporteve. Përgjatë tri javëve, nuk ka munguar gjuha intimiduese e fyese e Kryeministrit Rama, ndërkohë që ministrja e Arsimit, Evis Kushi, si një ish-pedagoge ka nënvlerësuar punën e tyre. Kauza e nisur për pagat ka shpalosur edhe shumë problematika që çalojnë sot në arsimin e lartë, siç ishte mungesa e një kontrate kolektive, e cila thuhet të jetë gati, si i vetmi fryt i kësaj proteste. Një tjetër rezultat i qëndresës tri javore, ndonëse pedagogët nuk e konsiderojnë, është shtesa e pagave me 7% në të gjitha universitetet dhe me 15% tek ato në Tiranë: Universiteti i Tiranës, Mjekësisë, Politeknikut, Sporteve e së fundmi edhe Bujqësorit.
Ish-ministri, pedagogëve: Kthehuni në auditorë
Ish-ministri i Drejtësisë, Ylli Manjani, ka një thirrje për pedagogët që protestojnë dhe kanë kërcënuar me grevë urie. Duke ironizuar gjuhën e Kryeministrit që i cilësoi si të pa fe, Manjani apelon ata që të heshtin dhe të paraqiten në auditorë, aty vidhet çdo gjë. Edhe dinjiteti. “Zonja e zotërinj pedagogë! Kthehuni në auditorë. Bëhuni me fe dhe punoni tek atdheu i hajdutërisë.
Rrogat e ulëta janë pjesë e atdheut ku të gjithë jetojnë me xhepin e tjetrit, me xhepin e hallexhiut. Edhe ju jetoni me xhepin e hallexhiut që të jeni bij të atdheut që ka ndërtuar qeverisja e keqe dhe shumë e keqe. Nuk ju del rroga? S’ka problem. Vidhni edhe ju si gjithë rrogëtarët e atdheut tonë. Feja e shqiptarit tashmë është hajnia (miratuar me VKM kjo fe). Bëhuni edhe ju si gjithë të tjerët. Heshtni.
Vidhni. Shisni provime, diplomat. Bëni siç bëjnë pedagogët e tjerë që kanë fe dhe paraqiten në auditorët e atdheut ku vidhet paraja, nderi, dinjiteti e vullneti. Mbani parasysh se në atdheun e hajnisë, askujt nuk i duhet diploma sot”.
Kërkesat e pedagogëve
Rritja e pagave për pedagogët dhe stafin ndihmës
Rritja e financimit për kërkimin shkencor Rivendosja e shtesave mbi pagë për ‘Dëshmi shëndeti në punë’
Rritja e shtesës mbi pagën për vjetërsinë në punë
Rritja e pagesës së orëve të ngarkesës suplementare
Rivlerësimi i orës mësimore, pasi ka zbritje prej 50% të pagesës së orës mësimore si rezultat i mosdiferencimit të orës mësimore të leksionit.
Rishikimin e tatimit prej 23% mbi pagesën e ngarkesës suplementare
Të pezullohet deri më 2026 zbatimi i pikës c) të paragrafit të 3, i Kreut III të VKM Nr.112, datë 23.2.2018 për kriteret e marrjes së titullit “Profesor”.
Të bëhet transparencë mbi buxhetin dhe të ardhurat e universiteteve publike.