Sondazhi / Monitorimi i financave të universiteteve tregon se janë shpenzuar 700.000$ për të siguruar literaturën e mësimit online dhe 2 milion euro për sistemin informatik, por vetëm 0.6% e Bibliotekës Dixhitale po shfrytëzohet dhe studentët studiojnë në platforma virtuale private. Mungesa e Kartës Studentore, kthimi i parave të paguara për konviktet, dështimi i VKM për pagesën e qirasë dhe rimbursimi nga qeveria
Qëndresa Qytetare 6 nga 9 universitetet e vlerësuara rezultojnë ngelëse në qasjen ndaj mësimit online.
Sipas sondazhit vetëm 0.6% e studentëve kanë shfrytëzuar Bibliotekën Dixhitale e cila kushtoi 700.000$ për të siguruar literaturën e mësimit online
STUDIMI/ Vlerësimi i situatës së Arsimit të lartë nën ndikimin e COVID19
Në datën 9 Mars 2020 Ministrja e Arsimit, Sportit dhe Rinisë, e ndikuar nga situata e krijuar nga pandemia Covid 19 nxorri Urdhërin nr. 91 “Për ndërprerjen e procesit mësimor në të gjitha institucionet arsimore publike dhe jo publike”. Menjëherë pas këtij Urdhëri, shkollat e arsimit parauniversitar dhe universitetet ndërprenë procesin mësimor. Ndërpreja e procesit mësimor u shoqërua me sfida të shumta të aplikimit të mësimit alternativ online. Por kjo lloj qasje e gjeti sistemin arsimor, institucionet e arsimit të lartë dhe familjet shqiptare të papërgatitura sa i përket efektivitetit, cilësisë dhe aksesit të nxënësve dhe studentëve në internet.
Qëndresa Qytetare publikoi sot rezultatet e vlerësimit të masave qeveritare dhe mësimit online nga studentët e 9 universiteteve publike gjatë periudhës së izolimit nga Covid 19. Nga pyetësori i zhvilluar me 720 studentë vihet re se 40.9% e tyre nuk kanë pasur akses të vazhdueshëm në internet gjatë izolimit nga Covid 19. 60% e studentëve që nuk kanë pasur internet theksojnë se arsyet kanë qënë ekonomike, ndërsa 40% e tyre shprehen se kanë pasur problem teknike për shkak të mungesës së mbulimit të zonës me internet. Akti normativ i qeverisë për shtyrjen e qirave u ka ardhur në ndihmë vetëm 17% të studentëve të cilët kanë arritur një marrëveshje me qiradhënësin ndërsa 83% e studentëve kanë paguar normalisht qiranë ose nuk e dinë se çfarë do ndodhë me këtë pagesë në vijim. Studentët kanë vlerësuar efektivitetin dhe metodologjinë e mësimit ku vetëm 3 universitete kalojnë provimin e mësimit online. 6 prej tyre rezultojnë ngelëse në qasjen në kohë dhe cilësi ndaj mësimit online.
Sipas sondazhit vetëm 0.6% e studentëve kanë shfrytëzuar Bibliotekën Dixhitale ( www.ulibrary.rash.al) e cila kushtoi 700.000$ për të siguruar literaturën e mësimit online, ndërsa 99.4% e tyre e kanë siguruar literaturën nëpërmjet leksioneve të dërguara më e-mail nga pedagogët, librave të skanuar dhe blerjes së librave në librari.
Vështirësitë e studenteve dhe procesi i mësimit online do të mund të përballohej më lehtë dhe do të kishte një performancë më të lartë nëse, Qeveria do të:
ribursojë qiranë e studentëve nëpërmjet akordimit të një bonus qiraje 100 euro në muaj
sigurojë marrëveshje dhe fond specifik për qasjen në internet të të gjithë nxënësve dhe studentëve nëpërmjet marrëveshjes me operatorët privatë.
61 Bashkite dhe Këshillat Bashkiake do të:
anulojnë tarifat e paguara nga studentët që banojnë në konvikte
marrin masa për të shtrirë mbulimin me valë interneti në të gjithë territorin e vendit.
Universitetet publike do të:
hartojnë planet e emergjencës për të shndërruar në një kohë më të shkurtër mësimin nga online në fizik.
përgatisin udhëzues mbi metodologjinë e vlerësimit të studentëve online përpara se të fillojë sezoni i provimeve.
përgatisin module të posaçme për sistemet e mbikqyrjes së mësimit online.
Minsitria e Arsimit, Sportit dhe Rinisë duhet
të bëjë ndryshimet e nevojshme ligjore për të parashikuar dhe njohur mësimin online si pjesë e formave të mësimdhënies në ligjin 80/2015.
GJETJET KRYESORE
Vetëm 14.3% e studentëve që banojnë me qira kanë lidhur një kontratë noteriale, ndërsa 85.7% e tyre janë marrë vesh verbalisht me qiradhënësin. 17% e studentëve që banojnë me qera kanë arritur një marrëveshje me qiradhënësin, ndërsa 28.3% e tyre janë detyruar të paguajnë qiranë normalisht. 54.7 % e studentëve nuk e dine akoma se çfarë do ndodhë me pagesën e tyre të qirasë.
40.9% e studentëve nuk kanë pasur akses të vazhdueshëm në internet gjatë periudhës së izolimit përkundrejt 59.1% të studentëve që kanë siugruar qasje të vazhdueshme në internet. 61% e studentëve që nuk kanë pasur internet thkesojnë se arsyet kanë qënë ekonomike, ndërsa 39% pasur problem teknike për shkak të mungesës së mbulimit të zonës me internet.
Vetëm 0.8% e studentëve shprehen se Karta e Studentit ka rritur mundësinë e tyre për të aksesuar mësimin online. 64.6% e studentëve pohojnë se Karta e Studentit nuk ka sjellë asnjë minimizim kostosh në blerjen e internetit apo pajisjeve elektronike, ndërsa 34.5% e tyre rezultojnë të mos jenë pajisur ende me një Kartë Studenti.
48.65% e studentëve të pyetur pohojnë se mësimi online ka nisur javën e dytë të izolimit, 45.25% janë shprehur se mësimi ka nisur pas javës së tretë të izolimit, 4.4% deklarojnë se mësimi online ka nisur që javën e parë të izolimit. Vetëm për 1.7% ky mësim nuk ka nisur ende. Ndërkohë mësimi online në Universitetin e Prishtinës ka nisur vetëm dy ditë punë pas ndërprerjes së mësimit fizik.
86.3% e studentëve e kanë siguruar literaturën nëpërmjet leksioneve të dërguara me e-mail nga pedagogët, 9.2% nëpërmjet librave të skanuar, ndërsa 4% nëpërmjet blerjes së librave në librari. Pavaërsisht se gjatë vitit 2019 qeveria shpenzoi rreth 700 000 $ për të blerë Bibliotekën Dixhitale www.ulibrary.rash.al, vetëm 0.6% e studentëve kanë shfrytëzuar këtë bibliotekë për të siguruar literaturën e mësimit online.
Universitetet e monitoruara financiarisht nga Qëndresa Qytetare kanë shpenzuar 1.891.000 euro për pajisje dhe sisteme informatike por studentët vijojnë mësojnë në platforma virtuale private. Universiteti i Prishtinës shpenzon rreth 100.000 euro në vit për mirëmbajtjen e sistemit informatik dhe ofron kete sistem si platforme mbeshtetes per shërbimin e mësimit online.
Ja rekomandimet e QQ për institucionet e qeverisjes qendrore,lokale dhe MASR
Qeveria duhet të përfshijë në Aktin Normativ Nr. 12, datë 2.4.2020 ribursimin e qirasë së muajve mars – prill 2020 për studentët nëpërmjet akordimit të një bonus qiraje 100 euro në muaj ose kompesim nëpërmjet mospagimit të tarifave të studimit deri në kompesimin e kësaj vlere për muajt e izolimit.
Këshillat Bashkiake dhe bashkitë universitare si zotëruese 100% të aksioneve të rezidencave studentore të trajtimit të studentëve duhet të rivlerësojnë dhe të mundësojnë kthimin e tarifave të paguara nga studentët që banojnë në konvikte për periudhën e izolimit për studentët që e kanë paguar tarifën e plotë dhe nuk i kanë shfrytëzuar godinat dhe shërbimet e konvikteve.
Qeveria, organet e qeverisjes vendore dhe universitetet duhet të akorodjnë fond specifik për sigurimine qasjes në internet për të gjithë studentët. Pajisja e tyre mund të realizohet në bashkëpunim me operatorët që ofrojnë internet nëpërmjet identifikimit me Kartën e Studentit ose regjistrat e universiteteve.
Minsitria e Arsimit, Sportit dhe Rinisë duhet të bëjë ndryshimet e nevojshme ligjore për të parashikuar dhe njohur mësimin online (distance learning) si pjesë e formave të mësimdhënies në ligjin 80/2015. Universitetet publike dhe jopublike duhet të hartojnë planet e emergjencës për të shndërruar në një kohë më të shkurtër mësimin nga online në fizik.
Universitetet publike duhet të përgatizin udhëzues mbi metodologjinë e vlerësimit të studentëve online përpara se të fillojë sezoni i provimeve dhe module të posacme për sistemet e mbikqyrjes së mësimit online. Vlen të shqyrtohet modeli i monitorimit të mësimit në kohë reale të realizuar nga Universiteti i Prishtinës.
Këshillat dhe organizatat studentore duhet të angazhohen për të identifikuar nevojat e studenëve për qasje në internet, mungesë të pajisjeve dixhitale dhe literature duke nisur një fushatë kombëtare donacionesh për mundësimin e akesëit në arsim të të gjithë studentëve.