Policia e Fierit thotë se ka arrestuar 43-vjeçarin, i cili një ditë më parë shkaktoi aksidentin tragjik, ku tre persona humbën jetën.
Në pranga është vënë shtetasi, Gerti Skënderaj, i cili edhe mbeti i plagosur si pasojë e aksidentit të rëndë.
Skënderaj mbeti i plagosur bashkë me bashkëshorten dhe vajzën 6-vjeçare pas përplasjes së ndodhur mbrëmjen e së enjtes në afërsi të fshatit Buzmadh në autostradën Levan-Tepelenë.
“Specialistët e Sektorit të Qarkullimit Rrugor në DVP Fier arrestuan në flagrancë shtetasin G. (M). S., 43 vjeç, banues në Cakran, Fier, për veprën penale “Shkelja e rregullave të qarkullimit rrugor”, pasi në datën 09.06.2022, rreth orës 20:20, në fshatin Buzëmadh, duke drejtuar automjetin tip “Opel Zafira”, është përplasur me automjetin tip “Ford”. Për pasojë është dëmtuar vetë drejtuesi i mjetit tip “Opel Zafira”, bashkëshortja e tij, shtetasja G. M. dhe vajza e tyre 6 vjeçe, si edhe kanë ndërruar jetë shtetasit S. L., F. L. dhe B. S., të cilët udhëtonin me automjetin tip “Ford””, thuhet ne njoftimin e policisë.
Ndërkohe materialet i kaluan Prokurorisë, për veprime të mëtejshme procedurale.
Viktimat:
Sokrat Lelaj
Bylyre Salaj – vjehrra e Sokrat Lelajt
Fatbardha Lelaj-bashkëshortja e Sokrat Lelajt
Te plagosur:
Gerti Skënderaj
Gladiola Meraj
Vajza 6 vjeçe.