Tërhiqet Ministria e Arsimit: Të dhënat e prindërve nuk do kërkohen

583
Ministria e Arsimit ka reaguar pas deklaratës së deputetes së Partisë Demokratike, Albana Vokshi, për mbledhjen e të dhënave nga prindërit. “MASR po krijon rrjetin e komunikimit në kohë reale me prindërit dhe mësuesit. Ky sistem do të rrisë transparencën dhe llogaridhënien e stafeve të shkollave kundrejt komunitetit të prindërve, të cilët duhet të jenë sa më të përfshirë me sugjerime dhe këshilla duke qenë të informuar për çdo rezultat apo nismë. Për ta bërë efektiv dhe të sigurt këtë proces, është parë e nevojshme nga specialistët vendosja e NID si element sigurie, për të shmangur çdo gabim raportimi të të dhënave në emër dhe mbiemër që informacioni të jetë sa më i saktë dhe të shmang dublikimet”, thuhet në njoftimin e Ministrisë. Dikasteri thotë se këto të dhëna nuk kanë asnjë qëllim të ndryshëm, por kanë një dhe vetëm një qëllim, informimin e prindërve se çfarë ndodh në çdo orë mësimi në çdo shkollë të Shqipërisë. “Theksojmë edhe një herë, se të gjitha akuzat drejtuar këtij procesi janë të ulëta, në rastin më të mirë dhe dashakeqe ndaj institucioneve të dijes ku mësojnë fëmijët e shqiptarëve. Për të shmangur spekulimin politik me këtë detaj që është vetëm teknik, Ministrja e Arsimit, Sportit dhe Rinisë znj. Nikolla ka nxjerrë urdhër për heqjen e kësaj kërkese”,vijon njoftimi. Sipas MASR, ngritja e rrjetit të bashkëqeverisjes me prindërit dhe mësuesit do vazhdojë edhe në mungesë të elementit NID.
Sigal