Gjatë ditës së djeshme disa persona të maskuar tentuan të grabisin një bankë të nivelit të dytë në Bulevardin Zogu i Parë në Tiranë. Ata kishin planifikuar çdo gjë me detaje, duke e bërë këtë grabitje spektakolare në llojin e saj. Themi kështu pasi autorët kishin më shumë se 20 ditë që po gërmonin në tunelin nëntokësor, ndërkohë që plani i tyre ka dalë zbuluar pasi është denoncuar nga banorët e zonës, që kishin dëgjuar zhurmën e matrapikut dhe më pas bëri që kjo vjedhje të mbetet në tentativë. Grabitësit kanë pasur informacion dhe për planimetrinë e godinës së bankës, ku do të duhej dhe të ishte përfundimi i tunelit. Për të mos ngatërruar rrugën, autorët kanë pasur një hartë të qartë të planimetrisë, ndërkohë që në tunel u futën të veshur me jelekë fosforeshentë, duke lënë të kuptohej se ishin punonjës të mirëmbajtjes. Autorët nuk janë identifikuar ende, por gjithsesi mënyra e grabitje vlen të theksohet se ishte si nëpër filma, alla’ shqiptare.
