Shpopullimi i Shqipërisë, Meta: Zbrazja e vendit rrezikon të kthehet në një fatkeqësi kombëtare

210
Sigal

Presidenti i Republikës Ilir Meta këtë të premte ka reaguar në lidhje me raportin e Institutit për Studime Ekonomike Ndërkombëtare të Vjenës, ku theksohet se nga viti 2010 deri në vitin 2019 janë larguar nga Shqipëria rreth 500 mijë qytetarë.

Meta përmes një postimi në rrjetin social Facebook thekson se ndalimi i shpopullimit të Shqipërisë, drama më të madhe që i ka ndodhur vendit dekadën e fundit, sfida më e madhe sipas tij është reflektimi dhe zgjidhja urgjente e një fenomeni të tillë.

Ndër të tjera kreu i shtetit thekson se me këto ritme Shqipëria rrezikon të kthehet në një fatkeqësi kombëtare.

“Ndalimi i shpopullimit të Shqipërisë, dramës më të madhe që i ka ndodhur vendit dekadën e fundit, është sfida më e madhe, që kërkon reflektim urgjent dhe zgjidhje konkrete.

Sipas Institutit për Studime Ekonomike Ndërkombëtare të Vjenës, nga viti 2010 deri në vitin 2019 janë larguar nga Shqipëria rreth 500 mijë qytetarë, disa herë më shumë në krahasim me Serbinë, Malin e Zi, Bosnjë-Hercegovinën, Maqedoninë e Veriut dhe Kosovën.

Me këto ritme dramatike zbrazja e Shqipërisë rrezikon të kthehet në një fatkeqësi kombëtare.

Adresimi i menjëhershëm i këtij fenomeni është emergjencë dhe çdo neglizhencë e mëtejshme do të kishte pasoja katastrofike”, shkruan Meta.