Sadije Agolli, gjithmonë pranë të madhit Dritëro

628
Sigal

Sekreti i një dashurie jetëgjatë…

[nga Letërkëmbimi me Dritëroin, “Dashuri në moshën e Krishtit”]

…. Ne i dhamë njëri-tjetrit shqetësime dhe gëzime, vuajtje dhe dashuri, mundime, përpjekje, rëndime dhe lehtësime, psherëtima dhe lot, por edhe të qeshura me shpirt, me zë të lartë, ndarje dhe afrime njësh, pra i dhamë njëri-tjetrit çdo gjë.

Unë pata privilegjin, që u rrita qysh në moshën 22-vjeçare me Dritëroin, që u maturova, u poqa, u mplaka së bashku me Atë. Pata fatin e madh që atij ia pasurova Muzën për të shkruar një libër me 238 faqe poezi dashurie, përveç personazheve në romane, tregime, drama e komedi.

E ndjej veten të plotësuar në jetën time me Atë, pasi arritëm të kuptoheshim me një lëvizje dore, gishti, këmbe, syri, kollitjeje…

Secili lë pas dhimbjen, një plagë të hapur, që ngacmohet vazhdimisht nga kujtimet, mbresat, nostalgjitë, me vdekjen asnjëri nuk mësohet. Edhe unë nuk po mësohem dot. Nuk kam dëshirë të dal, të pres dhe të përcjell njerëz, e ndiej veten më mirë në vetminë time, të hedh shënime, të shfletoj dosjen e letërkëmbimit, librin me poezi “E bukura, lozonjarja, tokësorja grua” dhe çdo gjë që ka lidhje me Dritëroin…

Kjo më qetëson. Pi kafe dhe cigare pa mbarim, megjithëse përpiqem t’i rralloj.

Mendoj si do ta përjetonte Dritëroi vdekjen time. E di se, megjithëse i dobët fizikisht do të shkruante poezi të bukura për jetën dhe vdekjen, për lindjen dhe ngrysjen e ditës, për zogjtë dhe lulet, për fluturat. Do të shkruante, megjithëse gishtërinjtë i kishte të shtrembëruar nga stërmundimi i një jete të tërë.

Gruaja ime, Sadija

Prej teje asgjë s’më ka ndarë.

Kam bredhur dete dhe vende

dhe çfarë s’kam parë!

Në dhoma hotelesh në botë

jastëkët më sillnin veç erën tënde…

Në rrugë qytetesh me miliona shkëndija

shikoja dhe thosha me vete:

Sadija…

2007

Njoftim

Me dhimbje të thellë, Ju njoftojmë se Znj. Sadije Agolli, bashkëshorte dhe muza e një jete e Dritëroit, ndërroi jetë sot. Do të përcillet për në banesën e fundit, me dashurinë e të afërmve dhe miqve, nesër, ditën e mërkurë, 27 shkurt, në orën 11.00.

Familja Agolli