Raporti i Mueller, tregoi pastëtinë time

207

Flet Donald Tramp: Raporti tregoi pastërtinë time

 

Megjithëse raporti prej 448-faqesh i prokurorit të posaçëm Robert Mueller për ndërhyrjen ruse në fushatën zgjedhore të 2016-ës nuk e përjashton plotësisht Presidentin Donald Trump nga faji, ai sigurisht që po e konsideron atë si të tillë.

“Po kaloj një ditë të mirë,” tha presidenti Trump në Shtëpinë e Bardhë, pasi u publikua raporti. “Nuk pati asnjë bashkëpunim, asnjë pengesë”.

Hetimi 22-mujor i prokurorit Mueller, ndërsa nuk arriti në përfundimin se zoti Trump kreu ndonjë krim, gjithashtu nuk e deklaron në mënyrë specifike se ai është i shfajësuar.

Ndërsa po merrte pjesë në një takim me veteranët e plagosur ushtarakë, pasi në ekranet televizive jepeshin detaje të gjetjeve të një versioni të redaktuar të raportit, presidenti Trump tha, “Kjo nuk duhet të ndodhë kurrë përsëri ndaj një presidenti tjetër, ky mashtrim”.

Avokatët e presidentit, Rudy Giuliani, Jay Sekulow, Jane Raskin dhe Martin Raskin, thanë në një deklaratë se “Rezultatet e hetimit janë një fitore e plotë për Presidentin … Është e qartë se nuk ka pasur asnjë shkelje penale”.

Avokatët e tij, gjithashtu, e cilësojnë raportin e prokurorit të posaçëm, se demonstron që presidenti Trump ka vepruar si duhet kur ka shkarkuar James Comey-n si drejtor të Byrosë Federale të Hetimeve.

Raporti thotë se prokurori i posaçëm gjeti “prova thelbësore” se shkarkimi i zotit Comey u bë për shkak të “mungesës së vullnetit të drejtorit të FBI-së për të deklaruar publikisht, se presidenti nuk ishte “personalisht nën hetim” dhe hetimi përcakton se Kongresi mund të vendosë, nëse kjo përbënte pengesë të drejtësisë nga zoti Trump.

Presidenti nuk u intervistua nga hetuesit. Në vend të kësaj, ai u dha përgjigje me shkrim pyetjeve, të cilat zyra e prokurorit të posaçëm i konsideronte “të pamjaftueshme”. Por raporti thotë se prokurori i posaçëm nuk vazhdoi përpjekjet për një intervistë me zotin Trump që do të ishte e kufizuar në disa tema, sepse kjo do të shkaktonte një “vonesë substanciale”.

Reagime të ndryshme nga ligjvënësit

 

Ligjvënësit demokratë dhe republikanë kishin reagime të ndryshme ndaj publikimit të raportit të reduktuar prokurorit të posaçëm Robert Mueller, për Rusinë.

Hetuesit arritën në përfundimin, se askush në fushatën Trump, komplotoi me dashje me rusët në ndërhyrjen në zgjedhjet e vitit 2016, megjithatë ata refuzuan të deklarojnë pafajësinë e presidentit, lidhur me akuzat se veprimet e tij penguan drejtësinë.

Në një deklaratë, senatori republikan i Oklahomës, James Inhofe e përshkroi raportin e Mueller si “shumë asgjë: asnjë bashkëpunim, asnjë pengesë” dhe akuzoi demokratët për “përpjekje për të njollosur presidentin”.

Në kontrast, demokratët, theksuan pjesë të raportit të redaktuar të prokurorit Mueller që dokumentonin kontakte midis rrethit të ngushtë të zotit Trump dhe operativëve të huaj, të prirur për të dëmtuar kundërshtaren demokrate të garës presidenciale, Hillary Clinton, duke hakeruar dhe publikuar emaile të ndjeshme nga fushata e saj.

Ata, gjithashtu, vunë në dukje dokumentacionin e raportit për rastet ku presidenti Trump kërkoi të pengonte hetimin për Rusinë. “Përshkrimi i detajuar i shkeljeve në këtë raport, çfarë tregohet në detaje të fuqishme dhe bindëse, nuk është asgjë më pak se një skandal kombëtar,” tha senatori demokrat Richard Blumenthal nga Kënektikati. “Ky raport është larg nga fundi i hetimit që ky vend ka nevojë dhe meriton.”