Në prag të festës së Kurban Bajramit, mes shumë mesazheve uruese nga personalitete të vendit tonë, nuk kishte si të mungonte dhe mesazhi urues nga Presidenti i Republikës, Ilir Meta, i cili i uron shqiptarëve sa më shumë mirësi, mirëkuptim, paqe, begati dhe dashuri tek të gjithë.
“Të mos ndalim përpjekjet për të shëruar plagët e thella të shoqërisë, varfërinë, korrupsionin, padrejtësitë, arrogancën dhe arbitraritetin dhe të kujdesemi e të mendojmë më shumë për të mirën e përbashkët, jetimët, të moshuarit, të vetmuarit, të sëmurët dhe për këdo në nevojë.”,- është shprehur më tej Kreu i Shtetit, në mesazhin urues të shpërndarë në faqen e tij zyrtare në ‘Facebook’.
Mesazhi i plotë i Presidentit Ilir Meta:
Gëzuar Kurban Bajramin!
Urimet më të mira për të gjithë besimtarët dhe qytetarët shqiptarë kudo ndodhen, me rastin e kësaj feste të shenjtë dhe vëllazërore, që na fton në sakrifica për forcimin e solidaritetit mbarëkombëtar dhe kapërcimin e çdo pengese, që frenon ndërtimin e një Shqipërie plotësisht europiane!
Sa më shumë mirësi, mirëkuptim, paqe, begati dhe dashuri në familjet tuaja dhe mes njëri-tjetrit!
Të mos ndalim përpjekjet për të shëruar plagët e thella të shoqërisë, varfërinë, korrupsionin, padrejtësitë, arrogancën dhe arbitraritetin dhe të kujdesemi e të mendojmë më shumë për të mirën e përbashkët, jetimët, të moshuarit, të vetmuarit, të sëmurët dhe për këdo në nevojë.
“Tek Zoti nuk arrin as mishi, as gjaku i tyre (kurbanëve) por devotshmëria dhe përkushtimi Juaj”. Kuran
Zoti ua pranoftë adhurimin dhe lutjet!